Arsenal duh loh, Barca lawmna thlentu Auba

Premier League club Arsenal-in Pierre-Emerick Aubameyang an duh tawh lo a, an club captain hlui hian Emirates Stadium-ah thla 18 zet hun a la nei chungin a thlawnin an chhuahtir!

Hei chauh a ni lo - a hrechiang intite chuan Arsenal hian Auba hi a contract an tihtawp manah pawisa an pe nual nia sawi a ni a, Gunners hian duh loh taktêin a ni, an duh loh ni.

Mahse, Arsenal boss Mikel Arteta-a'n a chhawr duh tawh loh striker hi Barcelona boss Xavi-a'n chhawr a duh a, lawm takin Nou Camp-ah a lo lawmlut - tunah chuan Barca-in an duh an hmu ta.

Pathianni Zan khan Barcelona hian khualmualah Valencia chu 4-1 in an hneh a, Auba-a'n a club thar tan hattrick a siam - Frenkie de Jong chuan goal khat a thawh ve bawk a, Valencia tana Carlos Soler goal khung chu mualpho zualpui khuhna chauh a ni.

A hming Auba
Barcelona-in Valencia khelmualah mikhual tlangnel zia an chhuah a, inkhel ṭan aṭanga minute 23-na lekah a vawi khat nana La Liga-a bul ṭantu Auba chuan goal hmahruai a khung - he goal luh theih nana Jordi Alba ball pek chu ṭha tak a ni.

Catalan club an phur laklawh a, goal khata lungawi an tum lo. De Jong chuan minute 32-naah Ousmane Dembele siamsak chu hnai set sawt aṭangin a tlawh goal a, hun tam a liam hmain 2-0 a ni der.

Barca-in an goal hnihna an khung aṭangin minute ruk a liam a, Auba bawk kan hmu nawn. Gabonese striker hian Gavi hnen aṭanga a ball hmuh chu hnai tak aṭangin a khung a, offside chungchangah video assistant rawn ni mah se goal hi an pawm.

Valencia-in minute 40 pawh a tlin hmain goal thum an chhuah der a, 3-0 a nih laiin Soler chuan an si phurh a sut ṭhenah inngai mah se VAR rawn a nih hnuah pawm a ni lo - Jose Gaye-a'n penalty box-a ball a thlawh luh hmain a lo 'out' hman a, La Liga-a VAR hmanga goal pawm loh hmasak ber a ni.

Auba vanneihna
Soler-a goal khung ṭha tak pawmsak a ni lo a, a hnual phah lo thung. Tottenham Hotspur aṭanga Valencia-a loan-a khel Bryan Gil chuan minute 52-naah penalty box-ah ball a thlawh lut a, Soler hian dive chungin a lo tauh lut.

Kum 25 mi midfielder Soler hian tun season inelna hrang hranga match 23 a khelh aṭanga goal kua a khungna a ni a, assist vawi hnih a nei tawh bawk - season ṭan dawn khan Liverpool leh Arsenal nen sawizawm an lo ni tawh.

Soler-a'n si phurh a sut ṭhen a, goal chhuah hnem Valencia harhna thlen turin a tawk zo lo. Minute 63-naah Pedri chuan box pawn aṭangin ṭha zetin a thlawh lut a, a tirah Spanish midfielder goal khung angin ziah luh ni mah se a hnuah Auba hminga dah a ni.

Pedri-a'n a shot hian a hmaa ding Auba chu a lo kun a, ball hian Auba taksa a tawh fuh avangin kum 32 mi striker goal khung anga pawm a ni a, Catalan club tana goal a khung hmasa berah hattrick a siam nghal.

Auba fakna
Arsenal duh loh Auba-a'n hattrick a siam a, a goal lina tur nia lang chu Valencia keeper Giorgi Mamardashvili-a'n a la dansak mah mah - a tan zan duhawm leh chhinchhiah tlak a ni.

Barca midfielder Sergio Busquets chuan, "Kan hnena a rawn awm aṭangin Aubameyang hi a thawkrim em em a, tun season-ah a inlan tam tawk lo tih chu keini pawhin kan hriatpui a ni. Player ṭha tak a nih avangin a thlawna kan lalut thei hi kan lawm takzet a ni," a ti.

Catalan club-in hnehna an chan avangin table-ah palina an ni leh ta a, Champions League rim an nam zel. December 4-a Real Betis an ngam loh hnuah league-ah an tlawm leh tawh lo.

Hetih chhung hian league match kua an khel hman a, vawi li an khingpui inhnehtawkpuiin, vawi nga an chak thung. Ningani zanah Europa League knockout playoff second leh khel turin Napoli an lenchilh zui dawn a, first leg-ah 1-1 in an inhnehtawk tawh.