Inter-in hun ṭha bawhpelh

Serie A champion lai Inter Milan chu an mikhual Sassuolo lakah 2-0 in an tlawm a, manager Simone Inzaghi naute hian an hmelma AC Milan tlan pela league hmahruaitu nih theihna remchang an neih chu an bawhpelh - pahnihna an nih leh rih a ngai dawn.

AC Milan chu Inrinni zan khan Salernitana nen an lo inhnehtawk tawh. Pathianni zanah Inter an inlan ve leh thung a, chak ni se chuan match khata khel tlem chungin hma an hruai tho ang, mahse San Siro-ah ngei an tlawm.

Sassuolo tan Giacomo Raspadori leh Gianluca Scamacca ten goal an khung. Goal hnih luh danah Inter tlarhnung lam an che fuh lo, goal hmasa hi keeper Samir Handanovic kapkara lut a ni a, goal hnihna luh dawnah pawh Scamacca chu ven lohin box chhungah zalen takin a awm bawk.

Inter hian hun ṭha chu an insiam nual - Skriniar, Ivan Perisic, Edin Dzeko leh Lautaro Martinez ten an hlah vek. Stefan de Vrij-a khung pawh VAR hmanga ennawn a nih hnuah an hnawlsak, ball petu Federico Dimarco chu a lo handball vang a ni.

Nerazzurri manager Inzaghi chuan, "Kan khelh danah ka lawm lo. Champions League kan khelh hnuah Serie A khel turin inbuatsaihna ni thum kan nei, amaherawhchu kan sawi angin kan khel chhuak thei si lo.

"Sassuolo hian Juventus leh AC Milan te an mualah an luhchhuah tawh tih kan hre sa, inven dan ka zir a hlawhtling lo kha a pawi. Chutihrualin match khelh hmabak 13 kan la nei a, nomawi humhim turin hun ṭha a la awm," a ti.

Inter hian match 25 aṭangin point 54 an hmu, hmahruaitu Milan an phak lohna chu point hnih a ni. Inter hi match khatin an khel tlem zawk a, an khelh hmabakah an chak a nih chuan a chung berah an awm thei dawn tho.