Bayern Munich an chesual nawn lo

Bochum lakah an mualpho a, Champions League-ah RB Leipzig nen an inhnehtawk bawk. Pathianni zan khan Bayern Munich chu mualpho thei dinhmunah an ding leh hman. Mahse, striker Robert Lewandowski goal hnih hmangin Greuther Furth 4-1 in an hneh.

Allianz Arena-a inkhelah goal kan hmu mai lo, chawlhlawk hma hretin table mawngphah Greuther Furth lamin Branimir Hrgota hmangin goal an khung hmasa nawlh, Bavarians hi an mualpho leh mai ang em, tih zawhna a lian hman hle.

Mahse, second half tirah Lewandowski hmangin an sut ṭan a, Poland international hian goal hnih a khung bakah Sebastian Griesbeck-a'n anmahni lamah ti lutin, goal hmasa ber siamsaktu Eric-Maxim Choupo-Moting chuan chak a nemnghet bawk.

Bundesliga season kal laia goal 28 khung tawh Lewy chuan, "Hun kan mamawh ve deuh a ni. A tir lamah tihsual kan ngah a, kan khelh dan phungah thutlukna a fuh tawk lo bawk, second half erawh duhthusama ṭha a ni," a ti.

Inkhel dangah Borussia Dortmund chuan Borussia Monchengladbach 6-0 teh meuhin an sawp. Germany winger Marco Reus chu a changtupa a ni, goal hnih a khung bakah Donyell Malen, Marius Wolf leh Youssoufa Moukoko te khung tur a siamsak - Emre Can pawhin goal khat a thawh ve bawk.