Jamshedpur-in Chennaiyin sawp

Pathianni zan Indian Super League inkhelah Jamshedpur FC chuan 4-1 zetin Chennaiyin FC an sawp a, league hmahruaitu ni chunga season khar an beiseina a sang zel - Chennai club erawh semifinal khelh an beiseina a thamral ta.

Men of Steel (Jamshedpur sawina) tan Ritwik Das, Boris Singh, Daniel Chukwu leh Deepak Devrani (own goal) ten goal khat ṭheuh an khung a, Greg Stewart-a shot chuan Devrani a per a, hei hi 'own goal' ah chhiar a ni.

Chennai club tan Nerijus Valskis chuan goal khat a khung ve bawk a, mahse, Lithuania international-in goal a khung hian goal li an chhuah tawh a, a team a kai harh zo lo.

Jamshedpur tan Ricky Lallawmawma leh Laldinliana Renthlei ten minute 90 an khel tluan a, Chennaiyin lamah Jerry Lalrinzuala chu minute 46-naah luhtir a ni bawk.

Chennaiyin hian beisei anga season an hman loh avangin coach Bozidar Bandovic chu a hna aṭangin an lo ban tawh. Mahse, assistant coach Sabir Pasha hnuaia an khelh hnuah pawh eng an la ang lo - match hnih aṭangin point khat chiah an hlawh chhuak.