Norrie tan nomawi pathumna

Cameron Norrie chuan Reilly Opelka chu 7-6 (7-1), 7-6 (7-4) a hnehin ATP Delray Beach Open nomawi a chawi. British number 1 hian tennis a khelh chhunga nomawi pathumna a vaw chhuak ve chiah.

Pathianni zan final inkhelah Norrie hi straight set hmangin chak mah se a awlsam lo, set pahnihah tie break an khel ve ve a, nikum lama semifinal a khelh tawhna hmunah a che fuh zawkah a ṭang ve ta a ni.

Kum 26 mi Norrie hian tun hmain Indian Wells leh Los Cabos nomawi te a lo la tawh bawk. Tun ṭumah hian hnehna chang turin darkar khat leh minute 51 a hmang a, set hnih khelh chhung atan chuan a rei thawkhat.

World number 13 Norrie chuan, "Ka tan chuan hun nuam bik a ni, kar tluana ka hun hman zawng zawng kha a nuam em em vek," a ti. A khingpui Opelka chu player ṭha a nih thu leh, world ranking lamah pawh a sang zual 10 zinga tel thei a nih thu a sawi bawk.