Martial chântu Sevilla chak zo lo

Pathianni zan khan Anthony Martial a inhliam a, Sevilla forward hi La Liga-a Espanyol nen 1-1 a an inhnehtawk ṭumin minute 26-naah lakchhuah a ni.

Manchester United aṭanga Sevilla-a loan-a khel Martial chawlh chen tur hi he thu buatsaih lai hian a la chiang lo. Sevilla an chak zawh loh avangin hmahruaitu Real Madrid chu point rukin an thlau ta a, Carlo Ancelotti leh a naute lawmna an thlen.

Martial an chân hnuah Sevilla-in minute 36-naa Rafa Mir goal hmangin hma an hruai a, an chak mai pawh a rinawm hman. Mahse, kar hmasaa 2-2 a Barcelona chelhtu Espanyol hi an mikhual team lakah an tlawm duh lo a, minute 50-naah Sergi Darder chuan si phurh a sut.

Minute 76-naah Sevilla defender Jules Kounde chu Javi Puado laka a chet dan mawi lo avangin hnawhchhuah zui a ni a, Sevilla-in goal dang an khung thei lo a, draw result-ah lungawi an zir a ṭul.

Pathianni zan inkhel dangah Real Betis chuan 2-1 in Real Mallorca an hneh a, table-ah pathumna niin season thara Champions League khelh an tumna an chhem nung zel.

Manchester City boss hlui Manuel Pellegrini enkawl Betis hian minute 25-na lekah Alex Moreno hmangin goal hmahruai an khung a, Mallorca hian Vedat Muriqi hmangin an chhanglet. Mahse, Willian Jose chuan penalty hmangin Betis tan a khung leh a, 2-1 in an chak.

Basque derby-ah Athletic Bilbao chuan 4-0 in Real Sociedad an hneh a, Dani Vivian, Oihan Sancet, Inaki Williams leh Iker Muniain ten goal khat ṭheuh an khung - Muniain hian penalty a hlah mah mah!