Pioli-a'n hrileng a kai

AC Milan coach Stefano Pioli chu Covid-19 a kai tih hriat a ni a, an coach in hri a kai thu hi Serie A hmahruaitu chuan Inrinni khan an puang - natna lang chhuak erawh a nei lem lo.

Ruahman dan chuan Inrinni khan Milan hian training nei tur an ni, mahse an coach Poili-a'n test a paltlang loh avangin training pawh an nei thei ta lo, khung hran nghal a ni bawk.

Milan chuan thuchhuah siamin, "Coach bak chu midang zingah hri kai an awm lo, an result chu a ṭha vek a ni. Napoli kan hmachhawn tura inbuatsaihna chu November 16, Thawhṭanni aṭangin kalpui chhunzawm a ni ang," an ti.

Italian club lian Milan player ṭhenkhat chu ram tan an feh chhuak mek, an player ṭhenkhat zingah coronavirus vanga buaina nei an lo awm tawh bawk. Goalkeeper Gianluca Donnarumma leh striker Zlatan Ibrahimovic te chu hri vei tawh langsar an ni.

Pioli kaihhruaina hnuaiah Milan hian season bul an ṭan fuh, league match sarih an khelh tawh aṭanga point 17 hmuin hmahruaitu an ni mek - chak loh an la nei lo. November 22, Pathianni hian an elpui Napoli nen an inhmachhawn ang.