Boruak a lum sa, cho leh cho Electric Veng Vs Chhinga Veng
Vawiin tlai dar 4:00 hian Mc Dowell's No.1 Soda Mizoram Premier League Season 7-ah champion lai Chhinga Veng leh anmahni hnaih bertu Electric Veng FC te an inhmachhawn dawn.
Chhingcows leh Electric Veng hi tun season-a an vawi thum intawnna tur a ni a, EFC coach Vanlalsawma Colney chuan, "Lungthu kim nana chak loh hi kan tum lo. Tun season-a Chhinga Veng hneh hmasa ber nih kan duh," tiin Vanglaini a hrilh.
Boruak lum sa
October 4 zan khan team pahnih hi an intawng a, Chhingcows 2-1 in an chak. Lammuala inkhel nung tak hian sawi zui a hlawh a, MPL7-a inkhel hmuhnawm ber zinga mi a ni.
Chhinga Veng forward MS Dawngliana'n first half-ah Zomuanpuia a nghawk tlu a, hrem a tawk lo. Hemi chungchang hi sawi nawnin Vanlalsawma chuan, "Red card pek ngeina tur a ni a, Dawngtea khan hremna a pumpelh laiin Ramhlun North foreigner chu a nghawk luih leh luih loh pawh hriat loah hnawhchhuah a ni thung," tiin thil kal tawh chungchang a sawi.
Electric Vengin minute 23-naah Isak Vanlalpeka hmangin hma an hruai a, heta an goal khung dan chungchangah hian Chhinga Veng coach Lalsangzuala Hmar chuan, "MPL season 7 chhung hian kan technical area-a goal min celebrate khum hi kan la tawng ngai lo," tiin a lawm loh thu Vanglaini a hrilh tawh a, EFC coach Sawma chuan freekick an pet na nen a inhnaih avanga thleng a ni a, an khingpui tih elna a awm lo tiin a insawifiah thung.
Amaherawhchu hetah hian a tawp lo, Chhingcows coach Sanga chuan, "An tluk der vanga freekick hmu an ni a, an chin nawn tawh loh ka beisei. Keini pawhin freekick an chawi lohna turin nawr tawm kan tum ang," tiin a sawi nawn leh bawk.
Cho leh cho
Chhinga Vengin Electric Veng FC khelh dan tur milin Serchhipah Chanmari FC an hmachhawn a, game rang khel thei player an luhtir a, vawiin tlaiah game rang an khel dawn.
Chhingcows coach Sanga chuan, "A ṭha ber zawnna tur a ni a, an ṭhat dan berah chuan kan cho ve tur a ni dawn lawm ni. Huaisen takin kan khel ang a, point thum hlawhchhuah tumin kan khel ang," tiin chak nawn a tum thu a sawi.
Electric Veng coach Sawma pawhin, "Kan hlau thawng hma deuh ṭhin a, match sariha point 16 hmu thei kan nih avangin kan hlauhna bik tur a awm lo. Hlauhthawn vangin ball vawrh te kan ching a, lei hrulah ball kan inpe ngam tawh tur a ni a. Kan chak a hun ve tawh," tiin an hlauh loh thu a sawi.
Captain Tetea
Electric Vengin captain C. Laldinmawia awm loh hnuah Isak Vanlalpeka chu captain atan an hmang a, Chhinga Veng nen erawh Isak-a awm tho mah se mifielder Vanlalremkima'n captain armband a hreng dawn.
Tetea hian Bethlehem Vengthlang an hmachhawn ṭumin red card a hmu a, match hnih hrem a nih avangin Chhinga Veng an hneh loh ṭum leh Ramhlun North an hneh ṭumin a inlan thei lo a, hremna tawk lo pawh ni se Serchhip zin hmaa a pain a boralsan avangin khel thei dinhmunah a ding lo hrim hrim.
Electric Veng coach Sawma chuan, "Tetea pa hriat reng nan Serchhipah ribbon dum kan hreng a, Chhinga Veng nen hian captain hreng se kan duh. Ani pawhin a pa tan inkhelh leh thuai a duh a ni," tiin a sawi.
Engtin zel?
Pehlawn rawlthar Emmanuel Lalchhan-chhuaha'n Chhinga Veng an hmachhawn ṭumin MPL a khel ṭan a, inthlahrunna nei loin ṭha takin a khel a, Serchhipa Ramhlun North an hneh ṭumin man of the match a thlan a ni zui bawk.
Striker David Lalchhuanawma pawhin season ṭha tak a hmang chho mek a, goal ruk a khung tawh avangin Chhinga Veng tlarhnung tan ven uluk a ṭul ang.
Chhingcows lamin game rang an khel dawn a, tawnhriat nei ṭha MS Dawngliana bakah midfielder Lalromawia, Lalrinchhana leh Lalmuansanga te an pawimawh dawn tihna a ni. Team pahnih hi attacking game khel ngam turin an point dinhmun a ṭha a, inkhel hmuhnawm khel turin player an neih ṭhat tawk bawk avangin entu an ṭhahnem ang.