MPL semifinal khel lo tur Chanmari nge Police?

Mc Dowell's No. 1 Soda Mizoram Premier League Season 7-ah Chanmari FC leh Mizoram Police FC te pahnih tan semifinal-ah hmun zuah niin a lang lo a, tun dinhmuna a lan dan chuan an pahniha pakhat zawk tan chauh knockout stage-ah hmun a awm.

Zanin dar 7:00 hian Chanmari leh Police te hi an inkhel dawn a, palina leh pangana inkhel hi quarterfinal ang hiala chhal theih a ni a, inkhel pawn lam boruak vangin en a châkawm bawk.

Coach thar Chawnga

Chanmari FC chuan palina dinhmun hauh reng chungin Serchhipa Chhinga Veng an hneh loh zawhah coach Lalruatliana Sailo (Tawia) aiah Chawngthansanga an lakluh thu an tichiang.

Chawnga hian MPL-ah Reitlang FC, Chanmari West, Chhinga Veng leh Bethlehem Vengthlang te a enkawl tawh a, tualchhung inelna sang berah sulhnu ṭha tak a nei tawh. Chanmari FC-in an lakluh chhan bera ngaih erawh CYMA Foobtall 2017-a an veng team final a luh pui vangah a ngaih theih thung.

Chanmari FC manager Lalhma-ngaiha Sailo chuan, "Coach thar chungah hian rinna kan nghat ngam a, kan phur thar leh tawh hle. Chawnga hnuaiah hian semifinal hi kan thlen ngei kan ring," tiin Vanglaini a hrilh.

Mizoram Police nena an inkhel tur chungchang sawi zuiin Angaiha chuan, "Kan intawn hnuhnun berah khan kan hneh a, kan hneh nawn leh ngei pawh ka ring. Police hi an ṭha tih pawh kan hria a, amaherawhchu kim thlapa an training theih bik loh avangin an ṭhat dan tur angin an la ṭha lo," tiin a sawi.

Police an ṭha

Mizoram Police-in an la chhawr tam loh player-te an chhawr chhunzawm thei dawn a, an ṭha chho dawn tih a chiang. Serchhip-ah Malsawmfela'n Police jersey hain a vawi khat nan MPL-ah a inlan a, Chawnpui FC lakah chak nemnghehna goal a khung.

Amaherawhchu, Police hian Lammuala an match hnuhnung berah Chanmari FC an hneh lo a, hemi ṭum hian Sawmfela leh Lalfakzuala tih loh player rinrawl an kim ṭhat avangin ngaih ṭha takin khelmual an lut bik dawn lo.

Police coach Lalbiaksanga Colney chuan, "Kan kim thei tur hi a lawmawm. Sawmfela hi player ṭha tak a ni a, player dang pawh an ṭha a, mahse chak tur chuan kan thawhrim tlan a ngai a ni," tiin Vanglaini a hrilh.

Mizoram Police hian civil player ṭha an kawl bawk a, rawlthar duhawm Eric Lalsangzuala an kawl a, ani hian Serchhipah MPL-a a goal hmasa bera a khung. Police hian Ramhlun North chhuahtir Joseph Lalnunpuia an lalut bawk a, Salem Veng tlangval hian theihna a neih sang avangin Police team-ah hmun a chan chhoh a rinawm bawk.

Inkhel pawimawh

Palinaa awm mek Chanmari FC hian match sarihah point 10 an hmu a, Mizoram Police hian point kua an hmu ve tawh bawk.

Team pahnih inthlauhna hi point khat chauh a ni a, palina nih tumin an inkhel dawn. Hriat tel tur erawh tun hi round 8 chauh a ni a, semifinal thleng hnai tawha inngai Chhinga Veng leh Electric Veng te hi an dinhmun a la him bik lo a, pathumnaa awm Aizawl FC pawh an player neih dan en lo a, an point aṭanga thlir chuan tling tur an la ni bik lo.