Ballon d'Or: Messi leh Ronaldo dawtah tu nge?
Khawvel footballer zingah tu nge ṭha ber? tih zawhna chu awlsam takin 'Lionel Messi' emaw 'Cristiano Ronaldo' tiin a chhan theih a, a thiam ber sawi a nih chuan hming dang a lang ngai lo.
Kum 2007 khan AC Milan legend Kaka hnenah khawvela footballer ṭha ber chawimawina Ballon d'Or pek a ni a, a hnuah erawh Messi leh Ronaldo tih loh chu he chawimawina dawng thei hi an la awm leh lo!
Kuminah erawh thawnthu a danglam a, Messi emaw Ronaldo-in kum 2007 hnua Ballon d'Or an dawn lohna hmasa ber nih theih 'kum' a ngaih a ni a, zawhna chu "Messi leh Ronaldo a nih loh chuan tuin nge Ballon d'Or hawn ang?" tih a ni.
A hming chu Modric
Real Madrid-in Champions League nomawi an chawi a, Croatia-in World Cup final an lut a, heng zawng zawnga player pawimawh leh langsar chu Luka Modric a ni.
Croatian midfielder hian World Cup-ah Golden Ball a dawng zui a, UEFA Player of the Year a ni a, Best FIFA Football Awards-ah Best Player-ah thlan a ni bawk - mimal chawimawina dawn theih apiang a la hui zel avangin Ballon d'Or pawh a dawn leh mai ringtu an tam.
Liverpool defender hlui Mark Lawrenson chuan, "Europe a ni emaw, khawvel hmun dang a ni emaw, kum khat liam ta chhung khan Modric aia midfielder ṭha zawk ka hmu lo," a ti.
En kan harsa Neymar
Neymar hian season hmasa khan Paris St-Germain tan match 21 khelin match 21-ah a inlan lo a, a khelhna match 19-ah an chak.
French club tan goal 22 a khung hman a, assist vawi riat a nei a, minute 59.6 dana goal hlawh chhuak zel ang a ni. Brazil tan kuminah match 10 khel tawhin goal ruk a khung.
Tottenham midfielder hlui Jermaine Jenas chuan, "Player danglam bik a ni a, Ballon d'Or a hawn ngei ka ring. Player form tak tak Antoine Griezmann leh Eden Hazard te pawh an awm ngei a, mahse Neymar hi chuan theihna a nei sang bik a ni," a ti.
Aw, nang rawlthar duhawm!
Kum 19 mi Kylian Mbappe-a'n France tan World Cup nomawi a chawi a, season hmasa khan PSG tan match 44 khelin goal 21 a khung a, assist vawi sarih a nei bawk.
World Cup-a kum 21 hnuai lam player zinga ṭha bera thlan hian kuminah club tan match sarih khelin goal 10 a khung tling leh der tawh a, France rawlthar chanchin hi khawthlang media te chaw tui ber zinga mi a ni.
Chelsea winger hlui Pat Nevin chuan, "Mbappe hi khawvel nghahfak chu a ni a, 'a ṭha ber' tiin a chanchin an sawi ṭhin ang," a ti.
Hazard a 'hot'
Tun season Premier League-a player 'hot' ber thlang dawn se Eden Hazard a ni ngei ang - tun season-ah league match riatah goal sarih a khung der tawh bawk.
Chelsea forward hian season hmasa khan Blues tan match 51-ah goal 17 a khung a, assist vawi riat a nei bawk. Minute 159 dana goal khata inrawlh zel ang a ni.
Belgium international hian World Cup-ah khan an ram team chu semifinal a luhpui bawk a, nomawi chhuan tur a neihchhun erawh 'FA Cup' chiah a ni.
Salah, i zunzam a ni!
Ballon d'Or hi khawvel ram hrang hranga journalist thlan bikten vote hmangin an thlang ṭhin a, hetihrual hian a huaihawttu France Football chuan fan-te ngaihdan hriat nan vote thlak theihin an siam.
Lionel Messi (48%) leh Mohamed Salah (31%) tih lohin vote an hmu meuh lo a, France Football chuan vote theihna hi website aṭangin an la thla daih!
Salah hian tun season-ah goal thum chiah la khungin beisei la phak lo mah se season hmasa khan Reds tan goal 44 a khung a, league-a mimal chawimawina dawn theih zawng zawng a hui bawk - Ballon d'Or hawn pawh ni se thil mak a ni lo ang.
Player dang
Hming kan tarlan ho bakah hian Antoine Griezmann leh Kevin De Bruyne hming a langsar hle bawk. Griezmann hian World Cup nomawi a chawi bakah Atletico Madrid tan season hmasaah goal 29 a khung a, Europa League leh UEFA Super Cup-ah a champion pui.
KDB hi Premier League-a Manchester City an champion theih nan player ṭangkai a ni a, league bikah hian vawi 1,161 pass a neihah 83.9% pass dik a nei thei!
Tlarhnung lam lam rik an awm a, Chelsea defensive midfielder N'Golo Kante, Champions League leh World Cup nomawi chawi kawp thei Raphael Varane leh Liverpool tlarhnunga danglamna thlentu Virgil van Dijk te hming a ri ring hle.
2018 Ballon d'Or nominees
# Hming Position Ram Club
1 Sergio Aguero Forward Argentina Manchester City
2 Alisson Goalkeeper Brazil Liverpool
3 Gareth Bale Forward Wales Real Madrid
4 Karim Benzema Forward France Real Madrid
5 Kevin de Bruyne Midfielder Belgium Manchester City
6 Edinson Cavani Forward Uruguay Paris St-Germain
7 Thibaut Courtois Goalkeeper Belgium Real Madrid
8 Roberto Firmino Forward Brazil Liverpool
9 Diego Godin Defender Uruguay Atletico Madrid
10 Antoine Griezmann Forward France Atletico Madrid
11 Eden Hazard Forward Belgium Chelsea
12 Isco Midfielder Spain Real Madrid
13 Harry Kane Forward England Tottenham
14 N'Golo Kante Midfielder France Chelsea
15 Hugo Lloris Goalkeeper France Tottenham
16 Mario Mandzukic Forward Croatia Juventus
17 Sadio Mane Forward Senegal Liverpool
18 Marcelo Defender Brazil Real Madrid
19 Kylian Mbappe Forward France Paris St-Germain
20 Lionel Messi Forward Argentina Barcelona
21 Luka Modric Midfielder Croatia Real Madrid
22 Neymar Forward Brazil Paris St-Germain
23 Jan Oblak Goalkeeper Slovenia Atletico Madrid
24 Paul Pogba Midfielder France Manchester United
25 Cristiano Ronaldo Forward Portugal Juventus
26 Ivan Rakitic Midfielder Croatia Barcelona
27 Sergio Ramos Defender Spain Real Madrid
28 Mohamed Salah Midfielder Egypt Liverpool
29 Luis Suarez Forward Uruguay Barcelona
30 Raphael Varane Defender France Real Madrid