Halep a inhnukdawk

Hmeichhe tennis world number 1 Simona Halep chu hnungzâng hliam vangin a la inkhel thei lo a, hei vang hian Kremlin Cup aṭanga a inhnuhdawh bakah WTA Finals khel turin a dinhmun a chiang ta lo bawk.

French Open champion hi China-a Wuhan Open an khelh laiin a inhliam a, hemi hnuah inelna a la hmachhawn leh lo. Romanin nula hi tun season chhungin inelna hmachhawn tawh miah lo pawh ni se number 1 ni chungin kum tawp a hmang tawh dawn, player dang tan umphak theih a ni tawh lo.

Kum 27 mi Halep chuan, "Kan dinhmun hi 100% in a la ni lo, tun hmain inpeih lo chungin ka inkhel tawh a, a hnuah nghawng ṭha lo a nei. Tunah chuan tawnhriat ka nei hnem tawh a, dam ṭha tak chung lo chuan court chhungah ka lut tawh lo ang," a ti.

Halep hian kumin chhungin Grand Slam final vawi hnih a khel a, Australian Open-ah pahnihna ni mah se, clay court inelna lian French Open-ah a champion. Major title pakhat chauh la rih mah se inelna dangah a chetṭhat ṭhin avangin ranking-ah a dinhmun a sawhnghet hle a ni.