Argentina aia vannei zawk Brazil

Football thiam ram pahnih inkhelah Brazil chuan hun tawp dawna Miranda tauh luh hmangin Argentina 1-0 in an hneh a, Tite-a naute hian Saudi Arabia-a ram paliin friend­ly match an khelh kualah chung­nung ber nihna an hauh.

Thawhlehni zan King Ab­dullah Sports City stadium-a inkhelah Lionel Messi a la tel lo a, Argentina captain awm loh ni hian Brazil lam pawh goal hmaah an hriam bik lo. Minute 93-naa Neymar pet chu changtu nei lo Miranda-a'n a tauh lut a ni.

Brazil ṭha zawk

Goal khat chauhin hnehna an chang a, chu goal pawh chu hun tawp dawna lut a ni. Heti chuang hian Brazil coach Tite chuan an elpui Argentina aiin team ṭha zawk an nih thu a sawi.

Brazil hian tlarhmaah Ney­mar, Philippe Coutinho leh Roberto Firmino te an tlar thei a, tawnhriat ngah lo awmkhawm Argentina tlarhnung erawh an su hawng hleithei lo, goal zawna vawi thum an pet zinga pakhat a lut. Player an rem dan ngaihtuah chuan an goal khung zat hi lungawina tur niin a lang lo.

Mahse, Tite ngaihdan erawh a dang, "Argentina khan goal khung theihna hun an insiam a, chak thei pawh an ni. Mahse, a khaikhawm nan chuan Brazil chu kan ṭha zawk," tiin a naute a dah chungnung thiam hle.

Kum 57 mi Tite chuan an goal chungchang sawi zuiin, "Kan team khan hun tawp hamrik a rik hma chuan tha kan thlah lo a, a tawpah chuan corner-ah kan che fuh. Ram tana chakna goal khung hi a nuam ṭhin a, a bik takin Argentina laka khung chu a lawmawm dan a dang ngei ang," tiin Miranda a lawmpui thu a sawi.

Scaloni a lawm

Argentina coach lailawk Lio­nel Scaloni chuan a player neih ṭhat chhawr lo chunga a naute khelh chhuah danah a lawm thu a sawi a, chutihrualin hmasawn ngaihna lai an la ngah thu a sawi.

World champion vawi hnih ni tawh Argentina tan hian Messi bakah Sergio Aguero, Gonzalo Higuain leh Angel di Maria chu koh an ni lo a, Juventus forward Paulo Dybala leh Inter Milan captain Mauro Icardi te chu tlarhmah an inkawp a, khel chhe lo mah se Brazil tlarhnung tan hnawksak thamin an che lem lo.

Scaloni chuan, "Vawiina ka naute khelh dan kha a zah­puiawm lo a, khawvel hmuhah pawh a chhuanawm hlein ka hria. Player naupang leh tawnhriat nei tlem deuh la ni mah se an thawk­rim a, an huaisen bawk. Kan khing­pui team khan an neih ṭhat ber ber an chhawr a, chuti chung chuan kan inthlau lo hle.

"Result hi a pawimawh a, chutihrualin tun ṭumah chuan a hmasa ber atan dah tur a ni bik lo ang. World Cup hnuah player an ngui em em a, ram ṭhenkhat ang bawkin indinthar leh tur chuan hun kan mamawh a ni," a ti.