Denmark Open-ah PV Sindhu a tla nghal

Badminton inelna ngaihhlut te zinga mi Denmark Open khelh mekah India nula chhuanvawr PV Sindhu chu a chak lo nghal a, champion tura beisei nei dang Saina Nehwal erawh harsa takin a chak hram thung.

Thawhlehni zan inkhelah seeded pathumna Sindhu hi minute 56 chhungin 17-21, 21-16, 18-21 in Beiwen Zhang lakah a tlawm, American shuttler Zhang hi player langsar ni lo mah se, ani aia ranking sang leh rinkai zawk a hneh thei hle - Sindhu nen an intawn hnuhnung pathumah hnehna a chang vek a ni.

Asian Games-a silver medal a lak hnuah Sindhu hian beisei ang result a nei hleithei lo, nomawi chawi belh loa season a khar a nih chuan a ranking pawh a hniam phah dawn chiang, tun dinhmunah Sindhu hi world number 3 a ni mek.

Sindhu a tlak lai hian Saina Nehwal erawhin fiahna hautak a paltlang hram. London Olympic bronze medalist hian Hong Kong nula Ngan Yi Cheung chu 20-22, 21-17, 24-22 in a hneh, hnehna chang tur hian darkar khat leh minute 28 zet a mamawh a ni.

Mipa singles lamah Sameer Verma chuan minute 44 chhungin Chinese shuttler Shi Yuqi chu 21-17, 21-18 in a hneh a, mixed doubles pair Ashwini Ponappa leh Satwiksairaj Rankireddy te chu 17-21, 18-21 in Korean team - Seung Jae Seo leh Yu Jung Chae te ṭangdun lakah an tlawm thung.