Africa Cup of Nations Egypt, Tunisia, Senegal, Madagascar an tling
2019 Africa Cup of Nations khel tur zawnna inkhelah Thawhlehni zan khan Egypt, Tunisia, Senegal leh Madagascar ten an khingpui ṭheuh hnehin AFCON khel turin an inpet tling.
Madagascar hian Equatorial Guinea chu 1-0 in an hneh a, an ram chanchina a vawi khat nan AFCON an khel dawn a, Cameroon-a inelna hmachhawn tura tling hmasa ber an ni nghal bawk.
Hei le Madagascar
Madagascar tan midfielder Njiva Rakotoharimalala chuan Equatorial Guinea laka an goal neihchhun a khung a, goal dang a luh loh avangin 1-0 in an chak a, match hnih khelh tur la awm chungin AFCON an inpetkai.
Group A aṭang hian Senegal chu AFCON khel turin an tling ve bawk a, Lorient midfielder Sidi Sarr chuan hun tawp nan minute li chiah a awm tawh tihah chakna goal hi a khung.
Madagascar leh Senegal-in vawi li khelh tawhah point sawm ve ve hmuin an tling chiang a, Equatorial Guinea leh Sudan tan beisei tur a awm ve tawh lo.
Cameroon chak zo lo
Group B-ah Cameroon chu Malawi chu goal khung loin inhnehtawkpui mah se nakkuma inelna thleng tur an nih avangin tling chiang sa an ni a, match li-ah point riat neiin hmahruaitu an la ni reng bawk.
Morocco-in Comoros lakah hnehna an chan ngei beisei ni mah se rin angin an khel chhuak lo a, beisei loh taka 2-2 a an inhnehtawk avangin AFCON khel chiang tur chuan an la nghah leh det a ngaih phah.
Group C-ah Mali (8 pts), Gabon (7) leh Burundi (6) ten AFCON khelh beiseina an la nei vek. Gabon-in beisei tur nei tawh lo South Sudan chu 1-0 in an hneh a, Burundi chuan an mikhual Mali chu 1-1 in an inhnehtawkpui.
Algeria beiseina thamral
Group D-ah Algeria-in Benin hneh se chuan tling chiang tur an nih laiin 0-1 in an tlawm a, mualneitu team nen hian point sarih ve ve neiin tling thei dinhmunah an la ding ve ve.
Togo-in 1-0 a Gambia an hneh laia Algeria an lo tlawm bawk avangin beiseina an nei thar ve leh a, point nga nei mekin point hnih chiah la nei Gambia pawhin beiseina an la nei.
Nigeria-in Group E hmahruaitu ni turin Libya chu 3-2 in an hneh a, South Africa-in 6-0 a an sawp hnu Seychelles chu 0-0 in an inhnehtawkpui a, point riat nei mekin an aia point khata sang Nigeria nen tling chiang deuhthawa ngaih an ni tawh.
Nghak rih la!
Zimbabwe tan vawi khat chak chiah a ngaih tawh laiin DR Congo nen 1-1 in an inhnehtawk a, Liberia chuan 2-1 in Congo Brazzaville an hneh bawk. Zimbabwe hian point riat neiin DR Congo (5), Congo (4) leh Liberia (4) te nen la tling thei vek an ni.
Group H aṭanga tling turin Guinea (10) leh Ivory Coast (7) chu dinhmun ṭha luahtu an la ni zel. Ivorian team hian Central African Republic chu goal khung loin an inhnehtawkpui a, Rwanda leh Guinea chu 1-1 in an inhnehtawk bawk.
Mauritania chuan 1-0 a Angola an hneh avangin Group I-ah point kua neiin dinhmun ṭha takah an awm a, Botswana chuan goal khung loin Burkina Faso inhnehtawkpui mah se beisei tur an nei tawh lo.
A 'tight' tawlh tawlh
Namibia chuan 1-0 a Mozambique an hneh avangin Group K-ah 2-1 a Zambia hnehtu Guinea-Bissau nen point sarih ve ve an nei a, a chak lo zawk team pahnih hian point li ve ve nei bawkin tlin beiseina an la nei vek!
Uganda tan AFCON chu chiang tluk deuhthaw a ni tawh a, Lesotho chu 2-0 a hnehin point 10 an nei a, Group L-ah hmahruaitu an ni mek.
Tanzania-in 2-0 a Cape Verde hnehin beiseina an la nei ve bawk a, Uganda hi tling chiang deuhthawa dah theih ni mah se Tanzania (5), Cape Verde (4) leh Lesotho (2) ten match hnih vek an la neih avangin beiseina an la nei zel.
Inkhel Result
Madagascar 1 - 0 Equatorial Guinea
Comoros 2 - 2 Morocco
Malawi 0 - 0 Cameroon
Burundi 1 - 1 Mali
South Sudan 0 - 1 Gabon
Swaziland 0 - 2 Egypt
Seychelles 0 - 0 South Africa
Rwanda 1 - 1 Guinea
Central Africa 0 - 0 Ivory Coast
Tanzania 2 - 0 Cape Verde Islands
Benin 1 - 0 Algeria
Niger 1 - 2 Tunisia
Lesotho 0 - 2 Uganda
Gambia 0 - 1 Togo
Zimbabwe 1 - 1 Congo DR
Botswana 0 - 0 Burkina Faso
Mauritania 1 - 0 Angola
Namibia 1 - 0 Mozambique
Sudan 0 - 1 Senegal
Libya 2 - 3 Nigeria
Liberia 2 - 1 Congo