London-ah Jacksonville Jaguars an inkhel dawn

American football club Jacksonville Jaguars chuan season tharah an match pahnih chu London-ah an khel dawn a, National Football League club zinga USA pawna match hnih khel hmasa ber an ni dawn. 

Jaguars hian London khawpuia an match pahnih khelh tur hi khelmual hmingthang Wembley Stadium-ah an khel dawn a, an khingpui tur erawh he thu buatsaih lai hian puanzar a la ni rih lo thung. 

NFL club Jaguars neitu Shahid Khan chuan, "Season khat chhunga London khawpuia NFL 'home' match pahnih khel hmasa ber kan ni tur hi ka lawm takzet a ni," a ti a, UK leh London nena inlaichinna ṭha zawk an neih zel a beisei thu a sawi bawk. 

Jaguars hian kum 2013 aṭang khan season tinin Wembley-ah match khat tal an khel ziah ṭhin a, Tottenham Hotspur Stadium chuan NFL match hnih tal an thleng ve dawn bawk. Mahse, Spurs khelmuala NFL match khel tur club erawh puanzar an la ni lo thung.

Super Bowl champion lai zingah Philadelphia Eagles chu London khawpuia inlan hmasa ber an ni a, 2018 khan Jaguars hi 24-18 in an lo hneh tawh. 

London mayor Sadiq Khan chuan, "London hi khawvela infiamna khawpui a ni a, Jacksonville Jaguars-in an home match pahnih kan khawpuia an khel tur hian minti lawm takzet a ni," tiin a sawi.