Atletico mikhual tur an hmachhawn châk Man United
UEFA Champions League last 16-ah Atletico Madrid-in zanin dar 1:30 hian Estadio Wanda Metropolitano-ah Manchester United an mikhual dawn.
An hmachhawn châkUCL last 16 fixture pawh a nih khan Atletico hmachhawn theih zingah Manchester United aiah group stage-a an awmpui Liverpool dah a ni a, Spanish club hi Bayern Munich nen pawh fuh an ni.
Bavarians hian group stage-ah an khingpui Barcelona tiamin an sawp vek a, Catalan club-in group stage an paltlang loh phah hial.
Fixture pawh danah Atletico an zualko a, Bayern an hmachhawn duh loh vang ni bawk mah se an zualko nachhan chu an hmachhawn theih zingah Man United an awm loh vang a ni.
Last 16 draw-ah tihsual a awm avangin a bul aṭanga pawh ṭhat a ni a, Atletico hi Manchester United nen an pawt fuh. Spanish club-in an hmachhawn theih zingah an tum châk ber chu a ni kher lo ang a, amaherawhchu Bayern ai hian English club hi an hmachhawn châk zawk tih chu a chiang.
A pawmawh takzet
Europe club lian chin chuan Champions League an ngai pawimawh a, Manchester City leh Paris Saint-Germain pawhin sum ṭhahnem tak an sen chhan hi Champions League nomawi an duh vang a ni.
Atletico pawh final ṭum thum lut tawh mah se nomawi an la chawi ngai lo a, vawi thum champion tawh Man United tan pawh a hlu tho. Chutihrualin tun ṭuma inkhel turte erawh ṭum dang zawng aiin Champions League nomawi hi a pawimawh lehzual.
Man United hian kum 2017-a League Cup an champion hnuah nomawi an la chawi leh lo a, nomawi ngaihhlut bik Premier League leh Champions Legue an champion theih loh avangin manager pawh an ban chho zut.
Tun season-ah pawh English club hian result ṭhat loh avangin Ole Gunnar Solskjaer an ban tawh a, league bakah FA Cup leh League Cup-ah pawh champion beiseina a bo tawh. Champions League-ah hian rinkai ni pha lo mah se Man United tan erawh an nomawi beisei theih awmchhun a ni tawh.
Atletico Madrid-in season liam ta mai khan La Liga nomawi chawi mah se tun season-ah an chet ṭhat an chhunzawm thei lo a, league-ah pawh panganaah awmin Man United ang thoin season thara Champions League khel lo thei dinhmunah a ding.
Kum 2011 aṭanga club enkawltu Diego Simeone pawh khawih chet theih loa ngaih ni ṭhin mah se tunah erawh a dinhmun a nghing ta. Argentine manager hmalam hun a chiang ta bik lo a, Estadio Wanda Metropolitano-ah thuneihna fawng chelh zui turin Man United laka result ṭha neih hi a pawimawh takzet a ni.
Big club inkhel
Atletico leh Man United ten season hmang ṭha tawk lo mah se big club an nihna a bo lo, club lian tih takah player ṭha pawh an kawl hnem. Champions League last 16 inkhel tur zinga en châkawm ber ang hiala chhal theih an ni.
Spanish club hian UCL knockout stage chinah an mualah record an nei ṭha a, kum 1997 aṭang khan match 14 khelin tlawm an nei lo, match kua an chak a, vawi nga an inhnehtawk.
Atletico record duhawm tak hi titawp theitu an awm a nih chuan Cristiano Ronaldo hi record aṭanga thlira ti thei awm ber chu a ni. Man United forward hian Atletico lamah goal 25 tehmeuh a khung tawh a, chung zingah chuan 2014 UCL final extra time ami pawh a tel.
Tun hnaiah Ronaldo hian goal khung harsat deuh mah se Champions League-ah kher chuan a ke a la hmui hle. Portuguese forward hian tun season-ah goal ruk a khung tawh a, Europe inelna sang berah hian goal 140 khung tawhin amah hnaih bertu Lionel Messi (125) aiin goal 15-in a khung tam zawk.
Vawi hnih chauh
Atletico leh Man United te hi ṭum hnih chiah an la intawng a, kum 1991 khan UEFA Cup Winners Cup second round-ah an inhmachhawn. Old Trafford-ah 1-1 a an inhnehtawk hnuin Spanish club-in Madrid-ah 3-0 in hnehna an chang.
Man United player zinga langsar deuh chu tuna manager ni ta Steve Bruce leh Mike Phelan te bakah Bryan Robson, Ryan Giggs leh Mark Hughes te ho an ni. Kum 21 hnuah an a ṭum hnih nan an inhmachhawn leh dawn a, tuna player tam zawk hi an inkhelh hmasak hian an la pian loh avangin an inkhelh tawhna result hi chuan zaninah awmzia a nei lo ang.