Man United vs Atletico : Team Bihchianna

Manchester United-in Pathianni zan khan Leeds United 4-2 in an hneh a, Atletico an hmachhawn hmaa result ṭha an neih avangin Estadio Wanda Metropolitano an luh hunah inrintawkna an ngah sawt ang.

English club tana chanchin lawmawm chu Jadon Sancho-a'n a theihna a pholang ṭan a, Paul Pogba a dam leh tawh bawk. Portuguese midfielder Bruno Fernandes-a'n hmun pawimawh a chang a, Leeds United laka goal khungtu Fred leh Anthony Elanga te team tan an ṭangkai ṭhin bawk.

Man United tana player pawimawh ber erawh David de Gea a ni a, Spanish player hian second keeper Dean Henderson tan khelhna chance a siam lo. Club tan player ṭha ber anga chhal theih a nih bakah tun dinhmuna keeper ṭha ber zinga mi a ni pha.

Ralf Rangnick-a'n match hnuhnung pahnihah Edinson Cavani a chhawr thei lo a, Atletico nen pawh hian Uruguayan forward hi a dinhmun a chiang lo. Eric Bailly erawh squad-ah a awm theih a rinawm a, amaherawhchu Harry Maguire, Raphael Varane leh Victor Lindelof te an awm avangin a khelh phak erawh a beiseiawm loh.

Atletico pawhin match thum a zawna an chak loh hnuah kartawp khan Osasuna 3-0 in an hneh a, Champions League match hnuhnung berah FC Porto 3-1 in an sawp bawk. Mak ang reng tak erawh Atletico hian tun season UCL bikah an khelmual Wanda Metropolitano Stadium-ah hnehna an la chang lo.

Diego Simeone tan chanchin lawmawm loh erawh hrem vangin Yannick Carrasco a khel thei dawn lo. Thawhṭanni training-naah Covid-19 positive nena inhnaih vangin Thomas Lemar-a'n training a zawm lo a, hliam vangin Benjamin Lecomte, Daniel Wass leh Matheus Cunha te an tel lo bawk.

Zanin inkhel turah hian Manchester United an kim ṭhat viau laiin Atletico Madrid erawh an kim dawn lo tihna a, amaherawhchu English club tan hian tlarhmaah danglamna thlen thei player Luis Suarez leh Joao Felix te an kawl tih hriat a ṭha. Man United hian Liverpool kawr ha ṭhin Suarez ṭhatzia an hrechiang ang.