A lal ramah Djokovic a lo kir

Tennis khel thiam hmingthang Novak Djokovic chu court-ah a lo kir leh ta a, hnehna a chang nghal. Serbian star hi Dubai Tennis Championship-ah inlanin a khingpui Lorenzo Musetti chu 6-3, 6-3 in a hneh.

World number 1 hian Covid-19 vaccine a lak loh avangin Australian Open a khel thei lo. Melbourne thleng tawh mah se thawn haw leh a ni, kuminah a la inkhel mumal lo. Dubai lamah erawh invenna la lo mah se a inkhelh theih a ni.

Kumina tournament a khelh hmasak ni mah se Djokovic thiamna a la nep chuang lo, set hnih an khelh lai hian a service a hloh miah lo. A khingpuiin break point vawi sarih hmu mah se a inchhanhim vek.

Kum 34 mi Novak hian Italian tlangval service hi vawi thum a chhuhsak thung a, aces vawi nga vaw chhuakin a khel ṭha pangngai nghal hle. Dubai Tennis Championship hi inelna lian ni lo mah se Djokovic vang hian ngaihven a hlawh phah viau.

Djokovic chuan, "Tawnhriat nuam tak a ni. Thla hnih leh a chanve hnuah ka inkhel leh chauh a ni a, chutiang chunga straight set a hnehna chan chu a lawmawm hle," a ti. A match lehpekah chuan Karen Khachanov leh Alex de Minaur inkhela chak zawk a hmachhawn leh ang.

A inkhelh tam loh avangin Djokovic hi world ranking lamah pawh a dinhmun a nghing, vawi nga a champion tawhna hmunah hian a che ṭha lo a nih a, inelna dangah world number 2 Daniil Medvedev a che ṭha si a nih chuan hmahruaitu an inthlak thei dawn.

ATP ranking-ah Djokovic hian chawlh kar 86 chhung chu a zawnin a chung ber dinhmun a luah mek. A elpui Russian tlangval Medvedev hi Mexican Open lamah a inlan ve thung a, champion tura rinkai a ni bawk.

Djokovic tan number 1 dinhmun humhim turin thlen san a ngai tihna a ni. Dubai Tennis Championship bakah hian Indian Wells chu a inlan leh theihna tur langsar a ni a, tournament dang erawh chiang taka puan a la awm lo thung.

Serbian star Novak hian vaccine lak ai chuan Wimbledon pawh khelh loh mai a duh thu a lo sawi tawh. French Open, Wimbledon leh US Open te hian ram dang mi an rama inkhel tur chungchangah thu chhuah an la siam lo - Djokovic dinhmun a la chiang lo tihna a ni.