Fury leh Whyte an inhmachhawn dawn

Dillian Whyte chuan WBC heavyweight champion Tyson Fury hmachhawn turin contract a ziak a, contract a ziah hian darkar tlemtê chauhin hun tiam a ral hman lo.

Kum 33 mi Whyte hian contract ziak turin nimin zing dar 11:30 thleng kha hun a nei a, kartawp leh Thawhṭanni thleng kha chuan contract chungchanga inbiakna neiin niminah contract hi a ziak ve chauh a ni.

British boxer ropui pahnih hi April 23-ah inhnek tura beisei an ni a, Wembley Stadium-ah an inhnek a rinawm - a boruak a tê thei dawn lo tih a chiang.

Fury chuan, "Dillian Whyte chuan dollar maktaduai riatin contract a ziak e, ava mak em! A damchhunga a hlawh tam ber hlawh chhuak turin contract a ziak e," tiin a sawi.

London tlangval Whyte-a'n contract a ziah lawk loh chhan hi Fury rilru tihbuai nana ti anga sawi a awm a, Fury chuan hei hi fiamthu thawh nana hmangin, "Whyte-a thluak game hian ka rilru a tibuai takzet. Ka na chhuak vek a, ka training camp lah a buai a, Whyte hi ka hmachhawn ang em tih pawh ka sawi thei lo," a ti a, a tih el nasa hle.

Whyte hi Fury-a WBC belt kawl lai fight tura tihchian sa a ni a, mahse, Fury-a team nen an indawr reng hnuah an inrem thei lo - hei vang hian fight promote tur chu bid hmanga zawn a ni a, Frank Warren-a ta Queensberry Promotions chuan pound maktaduai 30-in an chang.

Kum 33 mi Fury hian fight purse-a sum hmuh tur 80% a chang ang a, Whyte hian 20% a chang dawn thung. Whyte hian sum tam zawk hmuh tumin rei tak nawr mah se tuna a dawn tur pawh hi a ṭha tawk hle - pound maktaduai 5.6 a dawng chiang dawn a, hei aia tam a career-ah a la hlawh chhuak ngai lo. Hnehna chang zawk tan pound maktaduai 3.1 a la hlawh theih bawk.

August 2018 hnua UK-a la inlan lo Fury hian vawi 32 fight a hmachhawn tawhah tlawm a la nei lo a, vawi 31 chakin vawi khat draw a nei a, a fight hnuhnung berah October 2021 khan Deontay Wilder chu round 11-naah a knockout.

Fury-a hmachhawn tur Whyte hi vawi 30 fight a hmachhawn tawhah vawi 28 chakin vawi hnih a tlawm a, Anthony Joshua leh Alexander Povetkin te chu a ngam lo - Povetkin hi March 2021 khan round linaah technical knockout hmangin a hneh leh ngat a, hemi hnuah erawh fight a nei leh tawh lo.

Boxer pahnih in fight tur thu hi vawiinah press conference hmanga official-a puanchhuah a nih a rinawm a, Fury hian British Boxing Board of Control aṭangin boxing licence a lak leh phawt a ngai dawn.