Neymar-a'n MLS-a khelh a châk

Paris Saint-Germain leh Brazil superstar Neymar chuan a career tawp lamah Major League Soccer-a a khelh châk thu a sawi.

Kum 30 mi Neymar chuan, "Brazil-ah inkhel turin ka haw leh ang em, tih ka sawi thei lo. Chutihrualin United States-ah erawh season khat tal chu khelh ka châk khawp mai. An inkhelh hun chhung a rei lo a, thla thum aṭanga thla li chawlh hun an nei. An kalphungah chuan rei tak ka khel thei ang," tiin chawlh tamna hmun MLS lama kal a châk thu a sawi.

Nikum October thla khan Neymar chuan 2022 World Cup zawhah ram tana inkhelh a chawlhsan theih thu a sawi tawh a, chutihrualin tun hnai maiah chuan MLS pan a la rem dawn lo. Nikum May thla khan PSG-ah a contract a pawtsei a, June 2025 thleng Paris-ah cham a la ṭul dawn. French club tana a contract a zawh hian kum 33 mi a ni tawh ang.

PSG star Neymar chuan, "Ka ṭhiante bulah pawh hian fiamthuin ka sawi ṭhin a, kum 32 hi inkhelh chawlhsanna hun atan a tawk chiah ka ti ṭhin. Amaherawhchu ka hmalam hun ka hre bik lo a, ka taksa leh rilruin a tlin chhung chu ka inkhel ang," tiin a sawi.