Alpine-in F1-ah beisei nei sang

Formula 1 team Alpine chuan season thara an car hman tur an pho chhuak a, chief executive Laurent Rossi chuan beisei an neih san thu sawiin hun rei vak lo hnuah champion thei zinga mi an nih theih tur thu a sawi.

Car intlansiakna sang ber F1 atana inbuatsaihna chuan a vawr tawp a thleng chho mek a, team 10 inlan tur zinga pakua chuan an car hman tur an pho chhuak tawh, inelna tak hi March thla aṭangin an nei dawn.

Laurent Rossi chuan, "Season hmasa khan intlansiak pakhatah hnehna kan chang, vawi khat kan chak a nih chuan a dangah pawh kan chak thei tihna a ni. Hmasawn kan ngaihna lai hrang hrangah kan insiamṭha.

"Tunah hian kawng dik kan zawh chho mek, a sang thei ang ber thlen tumin hma kan la. Season tharah hian team ṭha kan nihzia lantir kan tum a, tun aṭanga rei vak lo hnuah chuan champion turin kan ṭha tawk tih a lang ang," a ti.

Alpine hian an driver ngai pahnih - world champion vawi hnih ni tawh Fernando Alonso leh Esteban Ocon te an chhawr leh dawn. Season hmasa khan team championship-ah pangana an ni a, hmasawnna tur erawh an la ngah hle.