Auba-a'n cham turin Dembele a ngen

Pierre-Emerick Aubameyang chuan January thla bazar chungchang a sawi chhuak a, tun hma lama a khelhpui tawh Ousmane Dembele chu Barcelona chhuahsan lo tura a ngen thu a sawi.

Thlasik bazarah khan Auba hian Arsenal aṭangin Catalan club hi a zawm. Hetihlai hian Auba-a'n Borussia Dortmund tana a khelhpui tawh Dembele chu Spanish club lian chhuahsan thei dinhmunah a ding thung, a tawpah erawh a cham.

Auba chuan, "Dortmund-ah khan ṭha takin kan lo khel dun tawh, player ṭha leh theihna nei sang tak a ni a, a nihna takah chuan Ousmane hi ball nen chuan khawvela player ṭha berte zing mi a ni.

"A nihna tak sawi chuan a cham hi ka lawm hle. Barca ka zawm tirh khan kan inbia a, 'i cham tur a ni,' ka ti. A cham dawn nge a chhuak tho dawn tih erawh ka hriat pui lo, ka sawi theih erawh tumna a awm chuan engkim hi a tih theih," tiin a sawi.

Kar tawp La Liga inkhelah Aubameyang hian Barcelona tan a goal hmasa ber a khung a, hattrick a siam zui. Goal dangin a chhunzawm tura ngaih a ni a, season tharah erawh elpui hautak a nei mai thei.

Barcelona hian ropui taka indin thar leh an tum mek a, chumi tur chuan player langsar ṭha tak an lak a ngai. Dortmund hmatawng Erling Haaland chu team tichak tura awhawm berte zinga mi a ni, an la ngei dawn em, tih erawh a la hriat loh.

Kum 32 mi Auba-meyang chuan, "Erling hian Barcelona rawn zawmin team khatah khel ho ni ila chu a lawmawm khawp ang. Kei chu inelna ṭha hmachhawn turin ka inpeih reng, khelhna hmun inchuha inelna chuan team tan rah ṭha a chhuah zawk ang," a ti.

La Liga lama palina ni lai Barcelona hian Ningani zan hian Europa League khel turin Napoli an lenchilh ang.