Ṭha takin ka la khel thei ang - Murray

Andy Murray chuan a hmangaih tennis huangah beiseina a la nei reng a, tun hma lam boruak a phak tawh lo a nih pawhin player ṭha dangte elphak turin ṭha taka a la inkhelh theih a beisei thu a sawi chhuak.

Thawhṭanni zan khan Dubai Tennis Championship-ah Murray hi a inlan, a match hmasa berah world number 158 Christopher O'Connell nen inhmachhawnin set a hloh nghal, mahse darkar hnih leh minute 51 hnuah 6-7 (4-7), 6-3, 7-5 in a chak hram.

Britain tlangval Murray hian set hnihna bikah a khingpuiin break point vawi riat a hmuh zinga pasarih chu a in chhanhim thei hram a, harsa taka set a lak hnuah a dingchang thei ta hram - beidawng loa a beihna rah a ni.

Kum 34 mi Murray chuan, "A awlsam lo ngei mai, result erawh ka duh dan a ni thung," a ti. Jannik Sinner leh Alejandro Davidovich Fokina inkhela chak zawk a hmachhawn leh dawn a, hna a awlsam dawn lo.

World number 1 hlui Murray chuan sawi zawmin, "Ka sawi tawh ang khan a rei thei ang ber inkhelh ka duh, ṭha taka tennis khel chhuak leh thei turin theihna ka la nei rengah ka inngai, beisei nei lo ni ila chuan inkhelh hian awmzia a nei lo ang," a ti.

Grand Slam vawi thum champion tawh Murray hi player ṭha bik zinga mi a ni, mahse a khel bawr hliam hi 2018 leh 2019 khan zai a ni a, a hliam hi a nat bakah a dam chian hleih theih loh avangin ngai a awh chhuak zo ta lo.