World Cup-ah Aguero kan hmu mai thei!

Football a chawlhsan tawh a, lung ṭhat lohna vangin Sergio Aguero a inkhel thei tawh lo. Mahse, Argentina international hlui hi Qatar World Cup-ah kan hmu mai thei, player ni loin team tana hna thawktu a ni thung ang.

Argentine Football Association (AFA) president Claudio Tapia leh Aguero te hi Thawhṭan zan khan an inbia a, thil la chiang vek lo mah se kumin tawp lama neih tur World Cup-ah a hmel kan hmuh hmel ta hle.

Kum 33 mi Aguero chuan, "Ka hna thawh tur tak kan la sawi fel lo. Mahse, team zingah chuan ka tel ang. Theih ni se chuan player ho zinga awm ka duh, an hlimna leh lawmna ṭawmpui phaka awm ve ngei pawh ka duh.

"Team tan eng emaw ti zawng taka mi ṭangkai nih ve ngei ka duh. Claudio Tapia nen inbiakna ṭha tak kan neih avangin ka lawm," tiin Qatar World Cup-ah ram tan feh chhuah ngei a la tum thu a sawi.

Manchester City legend hian chona thar hmachawn tumin Barcelona a pan a, mahse Spanish club lian tan hian a inlan mumal hman lo. Tlan hah a thei tawh lo a, thawk lama harsatna a neih avangin a duh aia hmain football a chawlhsan.

World champion vawi hnih ni tawh Argentina tan Aguero hian match 101 a khelh aṭangin goal 41 a khungsak hman. South American ram hi Qatar World Cup khel turin an tling fel tawh a ni.