Champion beiseitu Liverpool hmaah Leeds

Tottenham Hotspur-in Manchester City an hnehsak avangin Liverpool tan Premier League nomawi chawi beiseina a vul thar a, zanin dar 1:15-ah beiseina thar nen Leeds United an mikhual dawn.

Liverpool hian Premier League hmahruaitu City hi point rukin an phak lo mek a, match khatin an khel tlem bawk - zaninah City khelh zat an khel chiah ang a, an chak chuan an inkarah point thum chauh a awm bawk ang.

Hei mai hi a la ni lo cheu - Reds hian Etihad Stadium-ah City hi an la lenchilh dawn bawk a, a tawi zawnga sawi chuan champion leh champion loh chu an kuta innghat a ni tawh.

Liverpool tana pawimawh hmasa ber erawh zanina Leeds hneh phawt a ni a, Anfield-a inkhel tur an nih avangin Jurgen Klopp leh a naute an inringtawk khawp ang.

Mahse maw...
Klopp-a rilru tibuaitu tur pakhat chu an fixture neih dan hi a ni - zaninah Leeds an mikhual ang a, Pathianni zanah Chelsea nen League Cup final an khelh zui a ngai dawn.

German coach tan uluk taka player inlan tur thlan a ṭul dawn tihna a ni a, tlarhnungah Virgil van Dijk kawppui tura Joel Matip aia Ibrahima Konaté a lut a nih pawhin thil mak a ni lo ang.

Tlarhmaah Roberto Firmino leh Diogo Jota chu hliam vanga inlan lo tur chiangsa an ni a, Sadio Mane leh Mohamed Salah kawppui turin Luis Diaz aiah Divock Origi chu lut tura ngaih a ni.

Salah leh Mane, a tu emaw zawk zawkin bul an ṭan lo a, Diaz a lut ta a nih pawhin a awm lo hran lo. Klopp-a'n England a pan hnuah League Cup nomawi a la chawi lo a, final atana inkhek khal a pawiti lo ang.

Leeds an nghing
Liverpool-in champion beiseiin an khel dawn a, Leeds erawh Premier League-a inhamtan chu an thupui ber a ni dawn - tlak hlau team tum hi an aia club ṭha zawka ngaih tum ai pawhin a harsa ṭhin a, Reds tan a awlsam lo ang.

Chutihrual chuan Leeds hi tun season-ah an tlarhnung a pawp hle - league-ah goal 50 an chhuah tawh a, anni aia chhuah hnem awmchhun chu league mawngphah luahtu Norwich City (53 goals) an ni a, inenfiah an mamawh hle.

Hetihlai hian Premier League-a goal khung hnem ber chu Liverpool an ni a, tun season-ah ringawt goal 64 an khung tawh - goal 20 chiah an la chhuah bawk si avangin Leeds tan a harsa dawn tih a chiang a, Marcelo Bielsa tan ngaihtuahna hman uluk a ṭul.

Leeds boss Bielsa chuan, "Kan league-a team ṭha ber pawl an ni a, an ṭhatzia hi sawi a lo ni fo tawh," a ti a, "Kan goal chhuah hnem lutuk chhan pawh kan hriat a ṭul," tia sawi zuiin insiamṭhat a tum hle.

An buai a ni!
Mahni thu duh ve tak, club lian pawh huaisen taka nawr mai ṭhin Bielsa-a'n insiamṭhat an tum thu a sawi a, an thiam dan ber, goal nawr hmangin an rawn khel leh tho tura ngaih a ni - anmahni ang thoa attacking football ngainatu Reds nena an innawr tur hi hmuh a châkawm.

Leeds hian Liverpool hrem tur khawpin player an nei ve tho tih hriat tel sak a ṭha a, Reds hian an zuam lutuk a nih chuan Raphinha leh Daniel James te hi club lian lakah pawh boruak sang ngam ve tak an ni.

Chutihrual chuan Leeds hian Sam Greenwood, Patrick Bamford, Kalvin Phillips leh Liam Cooper te hliam vanga an chhawr theih loh chu an tuar tih hriat telsak a ṭha a, Bielsa dem viau a harsa.

Zaninah pawh defender Robin Koch chu Manchester United nen an inkhelh ṭuma a hliam vangin a inlan thei lo ang tih a chiang a, Bielsa tan United laka tlawm hnua Liverpool lenchilh hi thil châkawm a ni lo ang.

Champion duh
Premier League-in a vanglai a tawng chho mek a, player piahlamah khawvela coach ṭha ber ber Pep Guardiola, Klopp, Thomas Tuchel leh Antonio Conte te ho awmna a nih avangin ngaihven a hlawh - coach tan pawh he league-a nomawi chawi chu a hlu bik.

Klopp pawhin a vawi hnih nan league nomawi chawi leh ngei a duh ang tih a chiang a, Trent Alexander-Arnold pawhin an coach duhna hi a ṭawmpui a, champion ngei a duh.

Tun season-a league match 22 a khelh aṭanga goal hnih leh assist 10 neitu defender chuan, "Match khatin kan khel tlem a, league-a kan beiseina chhi nung tur chuan he match-ah hian kan chak ngei a ṭul.

"Kan chak a nih ngat chuan league-a kan dinhmun chu chawisanin a awm dawn - chak ngei kan tum a, point thum hmuh ngei tumin theihtawpin kan inbuatsaih a ni," a ti a, tih mai mai a tum lo.

Salah & Mane
Liverpool squad en ila, kil tinah player ṭha hmuh tur an awm - heng zinga ngaihven hlawh ber erawh Salah leh Mane an ni a, anni pahnih inkawp hian football hmuhnawmna vawi tam min phochhuahsak tawh.

AFCON final-ah player pahnih hi an intawng a, Mane-a'n Senegal chu Salah-a Egypt lakah a champion pui. Liverpool-a an kir hnuah erawh tum thuhmun an nei a, Mane hian Reds thuneitute hnenah AFCON an champion chungchang chu Salah a zah avangin sawi ri lo turin a ti.

Player pahnih inkar a ṭha tih a chiang a, boruak ṭha tak hnuaia an inlan tur hi en châkawm chu a tling. Salah hian tun season-ah match 30 khelin goal 25 a khung tawh a, assist vawi kua a nei bawk.

Mane hian match 29-ah goal 11 khungin assist vawi khat a nei a, player thar Diaz pawhin Norwich City lakah goal mawi bik khungin Anfield-ah a tlangnel tawh hle.