Bengaluru tan semifinal beiseina a la thi lo!

Indian Super League semifinal inchuh boruak a 'hot' chho zel - Bengaluru FC chuan Thawhṭanni zan khan Odisha FC chu 2-1 in an hneh a, semifinal beiseina an neih chu an chhem nung ve leh ta.

Odisha tan Nandhakumar Kekar chuan goal hmahruai khung mah se Bengaluru tan Danish Farooq leh Cleiton Silva ten an chhanglet a, a tawpah 2-1 in hnehna an chang.

Mizo tamna Odisha an tlawm avangin semifinal khelhna chance a tlem ta viau a, nizan khan Mumbai City-in East Bengal an hneh chuan Odisha hian a thiam pali zingah season an khar thei tawh lo ang - he thu buatsaih a nih lai hian result kan hre hman lo.

Inkhel chu
Bengaluru-in inkhel ṭantir aṭangin inkhel an thunun nghal a, Bruno Ramires chuan minute rukna lekah chance duhawm nei mah se goal-ah a chantir thei lo - Odisha lamin minute hnih hnua an chance duhawm chu goal-ah an chantir thung.

Odisha striker ṭha mi Jonathas Cristian de Jesus-a shot per lehlam aṭanga ball kal chu Nandhakumar chuan goal-ah a chantir a, match hnih chhung a zawna tlawm tawh Bangalore club ṭantuten hlauhthawnna nen inkhel an thlir.

Javi Hernandez -a'n Odisha tan chance a hlah ve leh hnuah Prince Ibara chuan Bengaluru tan uiawm takin a hlah ve leh a, mahse, Bangalore club an harh zawk - Roshan Singh-a corner aṭanga ball kal chu Farooq -a'n a tauh lut a, chawlhlawk hmain si phurh an sut.

Ruatthara a pawi!
Second half ṭantir aṭangin Blues bawkin inkhel an thunun zui a, chak an duh - minute 49-naah an duh an hmu ta nge nge a, Mizo defender Lalruatthara chu box chhungah Udanta Singh lakah a foul a, penalty a chawi.

Bench-ah Sunil Chhetri a awm avangin penalty pet turin Silva a lo pen chhuak a, Thai football legend hian goal-a chantir turin harsatna a tawk lo. Goal hnihna an chhuah hnuah Odisha tan Hernandez chuan si phurh sutna remchang nei mah se a chhawr lo.

Hun tawp thlengin goal dang a lut lo a, goal chhuah hmasa zawk Bengaluru an chak a, semifinal an mitthla leh ta - match hnih chiah khelh tur an neih tawh avangin an chunga club-te chetsual an chan tel erawh a ṭul thung.

Mizo inlan
Odisha tan Ruatthara bakah Isaac Vanmalsawma leh Jerry Mawihmingthanga ten inkhel bul an ṭan a, Hnahthial tlangval Isaac hi minute 86-naah lakchhuah a nih laiin Jerry erawh a khel tluan thung - Daniel Lalhlimpuia chuan Isaac hi a thlak.

Kalinga Warriors (Odisha sawina) coach Kino Garcia chuan, "Kan chance neih zozai en ila, point thum emaw point khat tal hmuh chu kan phu a ni," a ti a, an khelh dan leh result a inmil loh thu a sawi.

Bengaluru coach Marco Pezzaiuoli chuan, "Top four beiseina kan la neih reng theih hi a pawimawh a ni," tiin an chak thei chu a lawm thu a sawi thung.