Ajax-in Nouri chhungte pawisa pe dawn

Addelhak Nouri chhungte hnenah Ajax Amsterdam chuan dollar maktaduai 8.9 an pek tur thu an puang. An player hlui Nouri hi inkhel thei tawh lo mah se, amah leh a chhungte an tuam hlawm chhunzawm dawn tihna a ni.

Eng vang nge?
Abdelhak Nouri hi player beiseiawm tak a ni a, player ṭha tam tak lo chher chhuak tawhtu Ajax aṭanga inzir chhuak a nih bawk avangin a lakah beiseina a sang zual, kum naupangte ni chungin Dutch club tan hian a inlan phak.

Mahse, 2017 khan Werder Bremen nen pre-season an khel a, inkhelh laklawh laiin lungphu chawl vangin khelmualah a tlu. A harh chhuak leh a, amaherawhchu a tluknaah hian a thluak a sawh chhia, ngai a awh leh tawh ngai dawn lo a ni.

Ajax chuan midfielder Nouri hi damdawi inah hruai nghalin, a ṭhat chhuah leh theihna turin theihtawp an chhuah. Mahse, a thluak chhia hi tih ṭhat leh theih a ni tawh lo, hmabak nei eng leh thleng sang thei tura rin chu hma takah a football khawvel a tawp.

An hre reng
Harsatna tawk Abdelhak Nouri hi Dutch club chuan an hre reng. Ajax general manager Edwin van der Sar chuan, "Addelhak chunga thil thleng kha pawi kan ti a, an chhungte kan tawrhpui takzet. Ajax pawh kan rilru a hrehawm hle.

"Chhun leh zan zawma a chhungten Addelhak an enkawlnaah kan lawm, ka va tlawh changte hian inhawng takin min lo lawm ṭhin. Club chhungkua chuan kan theihtawpin kan ngaihtuah chhunzawm zel ang," a ti.

Vanduaina thlen hun kha 2017 ni mah se Ajax hian Nouri hi hlawh pangngai an pe chhunzawm reng a, March 2020 khan a contract pangngai chu a tawp chauh. A contract tawp hnuah pawh tun hnai khan pawisa an la pe leh tihna a ni.

UCL lamah
An player ṭha chelh thei ṭhin lo mah se Ajax hian Champions League an khel phak deuh reng a, a tikimtu ni satliah loin team hmuhnawm zinga mi an ni ṭhin. Season duhawm hmang mektu Ajax hian zanin dar 1:30 hian Champions League last 16 first leg khel turin Benfica an lenchilh ang.

Erik ten Hag enkawlna hnuaiah Ajax hi an vul leh mek a, inelna hrang hrangah match 10 chhung an chak zawn mek - zaninah pawh Portuguese club tan fimkhur a ṭul ang. Team pahnih vawi li intawn tawhnaah Dutch club hi vawi hnih chak tawhin record an nei ṭha, Benfica hi vawi khat an chak ve tawh.

Ajax hian Sebastien Haller an nei tih hre thar leh ila. Ivory Coast international hian season kal laiah Dutch club tan match 28 aṭangin goal 28 bawk a khung tawh a, hmatawng hriam bik hi tlarhnung nem ve tak Benfica tan ven uluk a ngai ang.

UCL Last 16
First leg
February 15, Thawhlehni
Paris Saint-Germain 1 - 0 Real Madrid
PSG: Kylian Mbappe 90+4'
Sporting Lisbon 0 - 5 Manchester City
MAN: Riyad Mahrez 7'; Bernardo Silva 17', 44'; Phil Foden 32'; Raheem Sterling 58'

February 16, Nilaini
RB Salzburg 1 - 1 FC Bayern Munich
RBS : Chukwubuike Adamu 21'
FCB : Kingsley Coman 90'
Inter Milan 0 - 2 Liverpool
LFC : Roberto Firmino 75'; Mohamed Salah 83'

Nizan result kan hre hman lo
Chelsea 01:30 AM Lille
Villarreal 01:30 AM Juventus

Zanin Inkhel Tur
Atletico Madrid 01:30 AM Manchester United
Benfica 01:30 AM Ajax

Second Leg
March 8, Thawhlehni zan
Bayern Munich 01:30 AM RB Salzburg
Liverpool 01:30 AM Inter Milan

March 9, Nilaini zan
Manchester City 01:30 AM Sporting Lisbon
Real Madrid 01:30 AM Paris Saint-Germain

March 15, Thawhlehni zan
Manchester United 01:30 AM Atletico Madrid
Ajax 01:30 AM Benfica

March 9, Nilaini zan
Juventus 01:30 AM Villarreal
Lille 01:30 AM Chelsea