Napoli leh Cagliari inhnehtawk

Serie A champion tum zinga mi Napoli chuan an chunga awm pahnih chetsual an chhawr thei bik lo. Luciano Spalletti naute hian hun tawp dawna defender Victor Osimhen goal hmangin Cagliari chu 1-1 in an inhnehtawkpui hram.

Thawhṭanni zan Sardenga Arena-a inkhelah mualneitu Cagliari an khel ṭha zawk, goal khung theihna remchang pawh an insiam nual. Minute 58-naah Gaston Pereiro chuan Napoli goalkeeper David Ospina paltlangin goal a khung.

Arsenal keeper hlui Ospina hian anmahni lama lut tur chu ṭha zetin vawi hnih a dang zui a, mikhual Napoli an che hleithei lo. Kut bengin an haw ngei dawn niin a lang hman, mahse hun tawp hma minute thum chauh awm tawhah si phurh an sut hram.

Hmahruaitu AC Milan an chak zo lo a, pahnihna Inter Milan an tlawm bawk. Pathumna Napoli hian Milan nih rual theihna remchang nei mah se an che fuh thei bik lo - Milan khaw club pahnih hnuaiah an awm chhunzawm rih a ngai.

Napoli manager Luciano Spalletti chuan, "Kan khel ṭha lo, tihsual kan ngah hle. Cagliari khan an khel ṭha zawk a, point thum hmu pawh ni se an phu ang ngeiin an hmu niah ka ngai thlap ang.

"Europa League khelh zawh hnua kan match khelh leh hmasak a nih avangin kan tan chuan a awlsam lo. Point khat kan hmuh avangin kan lawm tur a ni," tiin an tan inhnehtawk chu result ṭha a nih thu a sawi.

Cagliari hi tla thei china awm an la ni a, match 26 aṭanga point 22 hmuin 18-na dinhmun an luah, an chunga awm Venezia nen an point neih a inzat. Season thara Serie A khelh chhunzawm tuma bei lai an nih avangin hmachhawn an awlsam lo.

Italy - Serie A
Cagliari 1 - 1 Napoli
Bologna 2 - 1 Spezia