Mayweather-a'n Khabib hmachhawn a chak

Boxing legend Floyd Mayweather chuan tun hnaia amah chotu UFC fighter Khabib Nurma-gomedov a chhang nawn leh ta a, "Ka khawvelah hian rawn zuang lut ta che," a ti.

Kum 41 mi boxer hian August 2017 khan Khabib-a'n UFC 229-a a hneh tak Conor McGregor chu a lo tukdawl tawh a, an inhnekah hian pound maktaduai 450 zet hmuhchhuah niin Mayweather hian pound maktaduai 210 a hlawh.

American fighter ropui chuan Khabib nen hian an inhnek a nih chuan McGregor nena an inhmachhawn ai khan sum a lakluh hnem a rin zawk thu a sawi.

Mayweather chuan, "McGregor nena kan inhnek ai khan dollar maktaduai 100 chuangin sum ka hmuh hnem zawk ka ring a ni. Dollar maktaduai 110 emaw 200 tal chuan ka hlawk belh ang," a ti a, Khabib chu sum siamna ṭha tak a nih a beisei!

Kum 30 mi Nurma-gomedov hian mixed martial arts-ah 27-0 record a nei a, Mayweather hian boxing-ah 5-0 record neiin Khabib hian, "Kan inhmachhawn nan eng-in nge min dal?" tiih American boxer hi a lo cho tawh a ni.

Mayweather chuan, "Kan inhmachhawn ngei ang. Ka tana thutlukna siamtu chu keimah a ni a, Khabib lamah enge buaina la awm ka hre lo. Keini chuan ani hmachhawn tur hian buaina kan nei lo.

"Kei chu Floyd May-weather ka ni a, ka duh danin thil a kal zel ang. Min hmachhawn a duh chuan ka khawvelah rawn zuang lut rawh se. Fighter dang zingah ka sum lakluh ang zat lalut ka la hre lo, chuvangin min cho a nih chuan ka hnen rawn pan rawh se," a ti a, Khabib nen an inhmachhawn dawn a nih chuan boxing ring a nih ngei a ṭul thu a sawi.

Khabib hian Las Vegas-a McGregor a hneh hnuah buaina a siam zui a, Mayweather chuan an pahnih inhmachhawn hunah he thil hi a thlen a duh lo.

American boxer chuan, "Inhnek i hmachhawn zawhah professional awm dan tur diktakin i awm tur a ni. Ring chhungah chauh a ni lo a, a pawn lam thlengin professional takin i khawsa tur a ni," tiin a sawi.