Man United-ah Shaw a nghet

Luke Shaw chuan Manchester United tana a rinawmzia lantir nan kum nga daih contract a ziak thar a, tun hnaia khel ṭha tak defender an thlung nghet thei hi United tan chanchin lawmawm a ni ang.

Southampton aṭanga Man United pantu Shaw hian hliam vangin beisei a phak lo ṭhin a, kuminah erawh bul a ṭan fuh hle. England international hi August leh September khan an club player of the month a ni hial.

Kum 23 mi Shaw chuan, "Sawiselna chi hrang hrang ka tawk reng a, min sawiseltute hi khelmual aṭanga chhan let zel ka tum ṭhin. Ka beisei aia hmain contract hi ka ziak fel thei," tiin a sawi.