Real-in Barca leh Girona inkhel tur duh lo

European champion Real Madrid chuan USA-a Barcelona leh Girona ten league match khelh an tum chu an duh lo a, Spanish Football Federation (RFEF) hnenah an duh loh thu hi lehkhain an thawn.

La Liga thuneitute chuan sum tam zawk hmuh inbeiseiin media company Relevent chu USA-a kum 15 chhung club tinin league match khat tal inkhelhtir ṭhin turin inremna an neihpui.

He thutlukna hi player leh Spanish FA ngei pawhin an duh loh thu an lo sawi tawh a, mahse Girona chuan remchangah lain January-a Barcelona an mikhual tur chu USA-a khelh La Liga hnenah an dil.

Barcelona lamin US-a khelh hi an lo remtih ve bawk si avangin Girona leh Barca inkhel tur hi US-a neih a nih theih nan La Liga chuan Spanish FA hnenah dilna a thehlut mek a, anni hian rem lo ti pawh ni se UEFA, US Soccer Federation leh CONCACAF hnenah an dil leh a ngai ang.

Real Madrid chuan Spanish FA hian phalna an lo pe mai ang tih hlauthawngin, "Team tinten mahni khelmual ngeia an khingpui an mikhual a, khualmuala zinte pawh an khingpuite khelmuala an inkhelh hi thil pawimawh tak a ni a, hei hi La Liga intluk tlanna leh zahawmna kengtu a ni," tiin an lehkhaah hian an ziak a ni.

Madrid khaw club chuan La Liga hian ram pawna match awm tura ruahmanna an siam hian club-ah nghawng a neih theih dan hre reng chung si a rawn an nih miah loh thu an sawi bawk.