Ramhlun North an chak ve ta

Mc Dowell's No. 1 Soda Mizoram Premier League Season 7-ah Ramhlun North-in vawi khat inkhelh chhuahah chak hmel an hmu lo a, phase 2 bika match hmasa berah Nilaini zan khan Bethlehem Vengthlang FC 2-1 in an hneh a, MPL7-a an chak vawi khatna a ni.

Lammual inkhel hmuhnawm takah Ramhlun North-in first half an thunun a, an phu ang ngeiin minute 45-naah Lalnunmawia hmangin hma an hruai. Minute 76-naah Lalliansanga hmangin goal hnihna khung leh bawk mah se BVT-in H. Lalhlimpuia hmanga siphurh an sut ṭhen nghal avangin hun tawp ham rik thlengin inkhel a hmuhnawm. Ramhlun North-in beiseina thar an neih laiin point hlawh chhuak zo lo BVT tan table mawngphah chhuahsan a harsa tawh ang.

Game rang nge phili?

Ramhlun North-in Serchhip-a red card hmu Musah Bamba an chhawr thei lo a, foreigner pahnih an la neihah Waheed Adekunle chu bul ṭantirin John Ampong chu bench-ah dah a ni thung a. Ghanaian midfielder John-a'n bul a ṭan loh chhan hi a tlan tam tawk loh vang niin a lang.

Tla thei dinhmuna ding team pahnihah Ramhlun North-in chak duhna an ngah zawk a, si phur sa ang maiin inkhelh ṭantirh aṭangin an hmanhmawh a, an ball chan zawng zawng chu a hma zawngin an thawn phei nghal zel a, an game a rang tih chu hai rual loh a ni a, ṭul loah vawi tam an hmanhmawh niin a lang bawk.

First half-ah Ramhlun North hian ball pawh 65% zet an chang a, Lalremruata leh man of the match-a thlan Lalmawizuala ten keeper Lallawmzuala chiah a awm tihin an khung lo a, finishing ṭha tawk lo a tih theih rualin an ball pek a chak mah mah tiin a sawi theih bawk. Left back H. Lalnunzira'n hla tak aṭangin crossbar a pet per a, Laldingngheta shot-cross chu goal pawnah chiah a kal a, goal hmaa vawi tam an vanduai hnuah Mawitea'n first half tawp hma chiahin hmahruaina goal a khung.

A la ngai reng

Second half-ah Ramhlun North-in an game tempo an thlak lo a, BVT-in point hmuh tuma risk an lak ṭan avangin mual chanveah chauh an inkhel tawh lo. Ramhlun North-in counter attack-ah Dingngheta tlan chakna hmangin an vaw let a, Remruata goal khung tur keeper Lawma'n a dan sak a, second half-a chance ṭha ber tiin a sawi theih.

Goal erawh minute 76-naah a lut tho a, Remruata ball pet chu captain Notea'n a lak thlak hnuah hmun chep tak karah a kheng lut a, Ramhlun North-in 2-0 in hma an hruai. Amaherawhchu minute hnih hnuah penalty chawi ve lehnghalin BVT tan coach leh player ni kawp Lalhlima'n an siphurh a sut ṭhen a, goal erawh a luh belh tawh lo.

Ramhlun North-in point thum hlu tak an hlawh chhuak a, chutihrualin semifinal beisei pha tur chuan an khelh danah insiamṭhatna tur a tam hle. Table mawngphaha awm BVT an hmachhawn chungin inkhelh a pawt muang thei lo a, first half-a goal an khung avangin awlsam taka chak thei an ni nachungin hun tawp thlengin an talbuai.