India-in a chet ṭhat ber ṭum a tawng

Summer Youth Olympics Games 2018 chu nizan khan Argentina khawpui Buenos Aires-ah a kharna hun hman a ni a, India chuan a pumpuiah medal 13 lain khawvel pum huap tleirawl rual infiamna khawmpui lianah hian a chet ṭhat ber ṭum a tawng.

Inelna hi October 6 aṭang khan South America ramah hian neih ṭan a ni a, Youth Olympic bik hi Asia khawmualpui pawna an nghah vawi khatna a ni. Russia chuan gold medal 28 lain pakhatna an ni a, anmahni hnaih bertu China chuan gold medal 18 an la thung a ni.

Youth Olympic Games-ah hian ram hrang 206 aṭangin infiammi 3,997 zet an pungkhawm a, inelna peng hrang 241 a awm. 2022-ah chuan Senegal khawpui Dakar-in a thleng ve thung ang.

Mizo pahnih

Youth Olympic vawi hnih an neih tawhah India tan gold medal la thei an la awm ngai lo, kuminah erawh Jeremy Lalrinnunga chuan weightlifting (62kg) huangah gold medal a chawi chhuak. Mizo rawltharin hnehna a chan hnu hian India tan shooting huangah Manu Bhaker (10m air pistol) leh Saurabh Chaudhary (10m air pistol)-ten gold medal an la zui ve bawk.

India tana medal tam tak chawi chhuak tawh Jeremy hi nizana kharna hun hman a nih khan India hnam puanzar kengtu (flag bearer) a ni a, Mizo zingah khawvel huap infiamna hunpuia hetiang dinhmun luah phak hi an la awm ngai lo.

Hmeichhe hockey inelnaah Lalremsiami Hmar telna India nula ten final lutin a thlengtu Argentina an ngam lo. Siami te hian gold medal la zo lo mah se India tana silver medal latu pasarih zingah an tel a, an thlen chin hi sawinep theih a ni lo ang.

Hockey bikah hian mipa team pawhin silver medal an vaw chhuak ve bawk a, Youth Olympic Games bika an inlan vawi khatnaah India player ten sulhnu an hnutchhiah ṭha hle.