Guardiola ngaisangtu Henry

AS Monaco manager thar Thierry Henry chuan Nilaini zan khan thuthar thehdarhtute a kawm a, managerial career a luhchilh theih nana a rilru hnehtu lian tak chu Pep Guardiola a nih thu a sawi.

Arsenal tana goal khung hnem ber Henry hian Leonardo Jardim hmun ruak luah turin inkhelh bul a ṭanna Monaco hi a pan a, French club hi manager bul a ṭanna a nih leh tak avangin a tan a hlu zual ang.

Belgium assistant manager hlui Henry chuan, "Pep hi ka tan chuan entawn tur leh minti phurtu a ni, ruahmanna leh inkhelh dan a hnuhchhiah te hi a ropui a, a nihna takah chuan midang hmaah a kal zel," tiin Barcelona tana a khelh laia amah enkawltu Spanish manager a dah sang hle.

October 20 hian a match hmasa ber atan Strasbourg nen an inkhel dawn a, kar leh maiah Club Brugge nen Champions League group match an khelh zui dawn avangin a hmabak a hautak, kar khat chhungin danglamna a thlen hman ang em tih chu fiahin a awm dawn.

A naute a khelh tir dan tur chungchang sawi zuiin Henry chuan, "Barcelona tana kan khelh ṭhin hunlai ami ang kha ka zir let dawn a ni, a dik emaw dik lo pawh ni se tumna kan nei ang. Pep nen chuan football chungchang hi a sawi reng theih a, zan mu lo pawhin a sawi reng peih, i mutthilh san a nih pawhin a lo la sawi reng ang.

"Mi ṭhenkhat hnen aṭangin zirlai i zir chhuak thei a, chu chuan phurna pawh a pe thei che. Mahse, chung i hriat sate chu nangma finna nen khan i hman pawlh thiam a ngai a ni," tiin manager a hrawn tawh leh ama thluak hmangin team enkawl a tum.

Arsene Wenger kaihhruaina hnuaia a hun hman chungchang sawi zuiin Henry chuan, "Wenger khan ka nuna tih theih loh tura ngaih tam tak min thlenpui, ani khan professional ka nih theihna turin kawng min hawn sak nasa hle a ni, ka theihnghilh ngai tawh lo ang," a ti.

France tan match 123 a khelh aṭanga goal 51 khungtu hian club leh internatonal football-ah player a nih lai chuan tawnhriat a ngah tawk a, team enkawl kawngah engtiang chiaha thui nge a kal theih tih chu hunin a la hril ang.