Chawnpui FC draw-tu Aizawl FC

Mizoram Premier League kai thar Chawnpui FC leh Aizawl FC te chu Nilaini zan khan 1-1 in an inhnehtawk a, tun ṭum hi tun season-a vawi hnih an inhnehtawkna a ni a, I League club hi a draw-tu ve ve an ni.

Serchhip-a inkhel nung tak lantirtu Aizawl FC-in Lammualah inrintawkna nen bul ṭan mah se Chawnpui FC-in Vanrammawia Ngente hmangin minute 44-naah hma an hruai a, Gift Raikhan-a hoten point an hmu zo dawn lo nia a lan hnuah Chawnpui keeper Thomas Lalthlamuana'n an lama a chum luh zarah point khat ve ve an insem.

Draw Specialist

Chawnpui FC hian phase 1 chinah draw vawi li an nei a, Aizawl FC hian vawi thum an nei bawk. MPL club pariat ngah zinga draw ngah pahnih an inkhel a, an duh erawh chak a ni. Chawnpui manager H. Lalzawmliana chuan, "Kan chakna chance chu 30% chauh ni mah se chak kan tum," tiin Vanglaini a hrilh a, AFC boss Gift Raikhan pawhin, "I League club tan Chawnpui laka chak zawh loh hi a mawi lo e," tiin chak an tum thu a sawi ve bawk.

Club hotuten an thusawi an din tlang pui ve ve a, chak tum ve vein minute 90 chhung an khel a, an tawp dan erawh 1-1 a ni. Aizawl FC siphurh sut aṭanga thlir chuan Chawnpui an vanduai a, amaherawhchu I League club-in 76% zet ball possession an neih avangin point khat an phuna chin a awm ve bawk.

Defending ṭha

Chawnpui FC-in team chhe zawk an ni tih an hria a, an tlarhnung player te an fual a, keeper nena an inkarah hmun awl an siam tam lo. First half-ah midfield leh defence inkarah hmun awl zuah mah se Aizawl FC lamin an hmu fuh thei lo a, minute 44-naah Vanrammawia Ngente-in a hun ṭha neih chu box pawn chiah aṭangin a pet goal.

Halftime-ah ṭha lehzualin an infuih a, second half-ah Chawnpui tlarhnung an phui hmak. Tlarhmasa bera awm goal khungtu VR-a chu defender hmasa ber a ni a, Aizawl FC tlarhnung te duh thalin ball a pet tir lo a, I League club-in halfway line an pelh chinah pressure an pe ṭha em em a, goal khung thei tura ngaih Alfred Kemah Jaryan, F. Lalremsanga leh Lalkhawpuimawia te chu uluk lehzualin an veng bawk.

Aizawl FC-in chance insiam an harsat a, chance ṭha an insiam chhunah Kelkang tlangval Mapuia'n a hlah bawk. Amaherawhchu injury time-ah Chawnpui tawnhriat neih tlemna a lang a, ṭul lo zetin box pawnah freekick an chawi. AFC midfielder Paul Ramfangzauva pet chu keeper Thomas-a'n ṭha zetin a dang a, Chawnpui keeper hmingṭha hman mah se hemi corner aṭanga ball vawrh chu duh thala man theih a ni nachungin an lamah a chum lut.

Chawnpui coach Laldinthara chuan, "Kan point hmuhah kan lungawi e. Aizawl FC chu team ṭha an ni a, anni laka point khat hmuh chu result chhia a ni lo. Kan keeper kha chu a chesual palh ve a, football-ah chuan a thlen chang a awm tur a ni," tiin Vanglaini a hrilh a, Thomas-a'n field a chhuahsan lai hian coach hian lo hnemin point hnih an hloh chhanah a mawhpuh lo.

Kromah tel lohna

Aizawl FC-in Serchhip-a che ṭha tak Ansumana Kromah an chhawr thei lo a, tlarhmaah danglamna thlentu an awm lo. Player naupang leh beiseawm Remsanga leh Isaac Vanlalruatfela te pressure sang leh awmze neia tlarhnung inrem hmaah an che thei lo a, substitute Kyrgyzstani midfielder Bektur Talgat Uulu pawh a danglam bik lo.

Season liam ta I League best coach Gift Raikhan chuan, "Ka player-te an ṭha a, chutihrualin Chawnpui nena kan inkhelah kha chuan special bik an awm a ngai. Kromah chu khel thei se goal khung hma ila, goal tam zawk pawh kan khung theih ka ring. Amaherawhchu minute 90 chhung kan khelh zawh chuan a vannei zawk kan ni," tiin danglamna thlen thei an mamawh thu a sawi.

Aizawl FC-in foreigner bakah Mizo player ṭha an la khawm a, heng team enkawl tur hian I League-a best coach ni thei Gift Raikhan an lalut chungin point thum hlawhchhuah an harsat a, MPL harsat zia a pholang. I League club hian October 26 zanah MPL-a chak la nei lo awmchhun Bethlehem Vengthlang an hmachhawn dawn a, semifinal lut tura dinhmun her remna remchang ṭha tak a ni thei ang.