Infiamna huanga mimal contract hlu ber Saul 'Canelo' Alvarez leh DAZN an inrem

Boxer rothap Saul 'Canelo' Alvarez chuan infiamna khawvela contract hlu ber ni turin DAZN nen inremna an ziak a, a hlut zawng hi pound maktaduai 278 a ni hem mai!

WBA leh WBC world middleweight kawnghren kawltu Alvarez leh DAZN inremna hi kum nga chhung atan a ni a, infiammiin contract an neih tawh zawng zawnga sum tamna ber a ni.

Kum 2014 khan baseball player Giancarlo Stanton chuan kum 13 chhung atan Miami Marlins-ah contract a ziak a, a contract hlut zawng hi pound maktaduai 208 niin kum 13 chhung atan a ni.

Hun rei tak chhung he contract khum thei an awm loh hnuah Alvarez a rawn lang a, a contract hi kum nga chhung atan chauh a la ni zui - Stanton a khum chiang hle.

Tute nge DAZN?

DAZN hi online hmanga infiamna huang bik en theih tura pe chhuak ṭhin an ni a, London lama hmunpui nei Perform Group hnuaia company niin Germany, Austria, Switzerland, Italy, Canada leh Japan-ah te an inbun tawh a, kuminah USA an luhchilh bawk.

Hemi awmzia chu DAZN hi tuna hmun an neihna hoah chauh en theih an la ni rih a, Saul Alvarez inhnekte chu India lamah chuan kan en thei rih dawn lo tihna a ni.

DAZN hian Premier League, Bundesliga, La Liga, NBA, NFL, MLB, Formula One leh Bellator MMA te pawh pe chhuakin Japan-a football league sang ber J League official-a pe chhuaktu ber an ni bawk.

Inremna chu

Canelo leh DAZN te inremnaah chuan Mexican boxer rothap hian kum nga chhungin fight 11 a hmachhawn ang a, heng fight-te hi DAZN chuan an pe chhuak ṭhin dawn.

Saul Alvarez hi US broadcaster lar HBO nen an thawkdun reng ṭhin a, mahse HBO hian kum 2018 tawp lamah chuan boxing khawvel an chhuahsan tur thu an sawi a, Mexican fighter hian sum tam zawkin DAZN chu inremna a neihpui ta a ni.

Kum 28 mi fighter hi amah ang thoa boxer ni ṭhin Oscar De La Hoya hnuaia Golden Boy Promotions chuan an buaipui a, De La Hoya chuan, "Saul hi khawvel infiammi zinga hlawh hnem ber a ni ta," a ti.

Sum thap ngamna

Saul Alvarez hi tunlai boxer zinga 'sumdawnna' atana ṭha ber pawl a ni a, September 15-a Gennady Golovkin nen a vawi hnih nana an inhmachhawn khan HBO-in sum an hmuhchhuah zat chu pound maktaduai 92 a ni.

Floyd Mayweather leh Manny Pacquiao hnua 'pay per view' lama en hlawh ber boxer hi HBO PPV lama a inlan ṭhin hma hian Showtime PPV-ah a inlan ṭhin bawk a, HBO/Showtime PPV lamah hian a vawi khat inhnek en turin £61.17 (Rs. 5,896) te sen a ngai ṭhin.

Mahse, DAZN erawh thla khat chhung 'subscribe' man hi £7.64 (Rs. 736.66) chauh a ni a, DAZN awmna hmuna Alvarez fan-te chuan an fighter inhnek hmachhawn lai hi pawisa chawi belh hranpa ngai tawh loin awlsam takin an en thei dawn tihna a ni.

Alvarez a phur

Infiamna khawvela contract tamna ber a ziak zo chiah a, Alvarez a phur hle. Vawi 53 inhnek a hmachhawn tawha vawi khat chiah la tlawm boxer chuan, "Hetianga contract ṭha ka ziak hian keipawh minti phur a, a aia ṭha lehzualin ka inbuatsaih dawn a ni.

"Boxing tana bung khar kaipuitu ka ni thei hi ka lawm a, hei hi keima tan chauh ni lo fan-te tan pawh hlawkna a ni dawn a ni," tiin a fan-ten sum seng tlem zawk chunga a inhnek an en thei tawh tur chu a lawm thu a sawi.

December 15-a Rocky Fielding nena inhmachhawn tur Alvarez hian a contract thar ang chuan thla khatah pound maktaduai khat aia tam a hlawh dawn tihna a ni a, Fielding hmachhawn tur hian weight khatin a insawn sang bawk.