WTA Finals khel tur a hriat kim

Season tawpa hmei-chhe tennis khel thiam a ṭha zual pariat ten an khelh tur WTA Finals-a inlan tur a hriat kim ta, Nilaini zan khan hmunruak la awm chu Elina Svitolina-i'n a hnawh khat chiah.

Hmun ruak pahnih luah tur hian mi pathumin beisei an nei. Mahse, Kremlin Cup khelh laiah Karolina Pliskova chu Vera Zvonareva lakah 6-1, 6-2 in a chak lo a, inkhel dangah seeded palina Kiki Bertens a tla bawk - Bertens hian WTA Finals khel tur chuan Kremlin Cup-ah hian semifinal tal a thlen a ngai a ni.

World number 1 hlui Pliskova hi chak lo mah se a thiam pariat zingah a tel thei dawn ta tho a, dinhmun duhawm a luah theih chhan hi an elpui Bertens-i'n result a neih ṭhat tak loh vang a ni.

October 21 aṭanga Singapore-a khelh tur WTA Finals-ah hian Svitolina leh Pliskova te hma hian, Simona Halep, Angelique Kerber, Naomi Osaka, Petra Kvitova, Caroline Wozniacki leh Sloane Stephens te chu an lo tling sa tawh bawk.

Tun season chhunga nomawi pahnih chawi tawh Pliskova chuan, "A vawi thum nan inelna ngaihhlut tak mai ka khel thei tur hi ka lawm hle, Singapore-ah hian 2016 leh 2017 khan ka inlan tawh a, hriatreng tur hun nuam ka tawng. Tun season chhunga player ṭha hlir nen kan inkhel leh tur pawh hi ka phur hle," a ti.