Stamford Bridge-ah Mourinho fiahna
International break hma chiah Premier League inkhelah Manchester United-in Newcastle United laka goal hniha an hnufual hnuah 3-2 in an lehthal a, Jose Mourinho bang tura thawm ring tak chu a chawl rih. Vawiin tlai dar 5:00 hian United-in Chelsea hmachhawn turin Stamford Bridge an tlawh dawn.
'Bus Park'
Chelsea-in United an mikhual hnuhnung 12-ah vawi khat chiah an chak lo. October 2012 hnuah United-in Stamford Brigde-ah chak hmel an hmu tawh lo a, Jose Mourinho chauh ni loin Sir Alex Ferguson awm loh hnua manager Louis van Gaal leh David Moyes te pawhin London club bu zawlah hnehna an la puang lo.
Portuguese manager hian United manager nichungin vawi thum leh Inter Milan manager nichungin vawi khat Stamford Bridge a tlawh tawh a, an chak lo vek. Nikum March thlaa an tlawh ṭum phei chuan Blues ṭantuten an pu hlui chu, "I danglam bik tawh lo, tunah chuan phatsantu i ni' tiin an au el a, zanin hian Mourinho-a'n a club hlui hneh let ve ngei a tum ang.
Amaherawhchu Maurizio Sarri hnuaiah Chelsea-in league-ah chak loh an la nei lo a, hmahruaitu leh champion lai Manchester City nen point 20 ve ve an hmu bawk. Hei chauh hi a ni lo, Sarri naute aiin Pep Guardiola hote hian ball an in pass tam zawk a, United ṭantute 'attack, attack, attack' tiin au mah se Mourinho rilru chuan mualpho pumpelh leh vanneih beiseiin 'bus park' a thlan a rinawm zawk.
United hian an match hnuhnung bera Newcastle United an hneh avangin an ṭha tihna a la awm lo a, an hneh team hi tun season-a chak la nei lo an ni. Chelsea nena an inkhel tur hi Mourinho tan United enkawl zel turin a la ṭha tawk em tih fiahna ṭha tak a ni ang.
An kim lo
Chelsea defender Antonio Rudiger chu ṭhal na vangin tun season-a a vawi khat nan league match-ah a awl dawn niin a lang a, Welsh defender Ethan Ampadu chu Spain nen an inkhelh ṭuma a khup hliam vangin a dinhmun a chiang lo.
Manchester United lamah Jesse Lingard ṭhal na chu a dam hman a rinawm lo a, Marcos Rojo chu a tel thei dawn lo chiang a; Ander Herrera, Scott McTominay, Nemanja Matic, Luke Shaw leh Marouane Fellaini te erawh an khelh theih a beiseiawm.
A thiam an dam
Mipui mit fukna tur erawh Eden Hazard a ni dawn a, Belgian forward hian a pu hlui Jose Mourinho hnuaiah khelh a la châk reng thu tun hnaiah sawi mah se zaninah erawh an inhmachhawn dawn.
Portuguese manager Mourinho hian tun season-a league match riata goal sarih khung tawh Hazard hi a veng uluk bik ang. En châkawm tur chu Jorginho che vel a ni a, Napoli midfielder hlui hi Premier League-ah pass ngah ber a ni mek a, United midfielder Paul Pogba nen an inhmachhawn dawn.
United player zinga langsar ber tura ngaih erawh French midfielder ni loin keeper David de Gea a ni a, Spanish keeper hi World Cup-ah che ṭha tawk lo mah se United chhhandamtu a la ni reng. Mourinho hoten goal venhim hna an thawk tura ngaih a ni nachungin goal nawr tur pawhin player an nei ṭha - Romelu Lukaku, Alexis Sanchez leh England tana che ṭha Marcus Rashford te an awm avangin khawvel keeper manto ber Kepa Arrizabalaga pawh inring renga a awm a ṭul dawn a ni.