A sang pali zingah Mizoram Police Chanmari tan semifinal luh harsa dawn!

Mc Dowell's No. 1 Soda Mizoram Premier League Season 7-ah Mizoram Police-in sa huai an ser ṭan a, Lalbiaksanga Colney hoten Ningani zan khan Chanmari FC hnehin semifinal khel thei chinah an awm. Police tan R. Malsawmtluanga leh Lalfakzuala ten goal an khung a, man of the atana thlan

F. Lalmuanawma a khelh ṭhat bawk avangin 2-0 in hnehna an chang.

Chanmari FC-in MPL2-a knockout stage awm ṭan aṭangin league round an la patlang ziah a, coach thar Chawngthansanga hnuaiah game nung tak khel mah se an elpui ber Police laka point an hlawhchhuah zawh loh avangin semifinal khel lo thei dinhmunah an ding.

Sawmfela telna

Serchhip-a MPL7 khelhah Mizoram Police-in Malsawmfela an chhawr ṭan a, Ramhlun South tlangval awm aṭangin an attacking a hmuhnawm lehzual a, an thiamna tak tak a lang ṭan niin a ngaih theih.

Police hian MPL5 best player Sawmfela bakah hian season liam ta best player

R. Malsawmtluanga, top scorer Fakzuala leh best keeper Muanawma te bul an ṭantir vek theih avangin an ṭha tih chiang. An sawiselna ber tlarhnungah pawh I League-a Aizawl FC champion puitu zinga mi Lalrinzuala Khiangte, season liam taa Police chet ṭhat puitu Lalhmunmawia leh B. Zoramthanga bakah 1st Bn MAP Academy chhuak Lalruatpuia te an tlar thei a, tlarhnung nei ṭha tiha sawi tur an ni tawh.

Attacking lama player ṭha rual zingah Chawnpui laka goal hmahruai khungtu Eric Lalsangzuala a awm tel bawk a, Armed Veng rawlthar hi a tikimtu ni ringawt loa a tiṭhatu a nih phak avangin hmabak a nei êng hle.

Coach thar hnuaiah

Chanmari FC coach Chawng-thansanga'n starting eleven a siksawi nghal a, left back-a chhhawr Lalmuanawma (C. Muana) chu defence laiah R. Lalawmpuia nen inkawptirin winger ke vei lama pet Lalṭhasiama chu left back-ah a dah thung a, right back-ah erawh Thomas Lalengkima rin chhunzawm zel a ni.

Match hmasa pangaa goal khung vek thei Lalnunzama chu match hnih goal a khung loh hnuah bench-ah dahin tawnhriat ngah zawk MC Malsawmzuala chu bul a ṭantir a, Laldampuia leh Lalmuanzova te mual sir aṭangin an thlawp. Midfield-ah Rochhingpuia chu tlarhnung pui tel tura dah a ni a, Chhinga hmaah hian Jeremy Laldinpuia leh Lahriatpuia te an awm.

Hmuhnawm leh vanduai

Bul ṭan phat aṭangin inkhel a nung nghal a, goal hmaah Police an hlauhawm hmasa zawk. Sawmfela'n player danglam bik a nihna a pholang nghal a, uluk taka ven karah ṭha zetin ball a thawlh lut. Ball um luttu Fakzuala a nih kher bawk avangin goal lut tura mipuiin an mithla laiin keeper MS Dawngliana'n a dang.

Chanmari an insiamrem a, inkhel an thunun a, an game rang tak chu training nei ṭha tawk lo Police-in dan an harsat. Hnahthial rawlthar Jeremy ball pet kawh zet chu keeper Muanawma'n a dang per hman a, Police keeper hian yard ruk chhung lek

aṭanga Muanzova goal khung tur chu a dang hman leh bawk. Chawnga hote an vanduai a kaltluanga a, winger tlan chak Muanzova'n keeper a bum hnuah ball a lak nat hret avangin a khung lo.

Player theihna nei sang pahnih inkhel a nih avangin goal chance bakah team pahnih ball inpe kual vel a hmuhnawm a, Chanmari FC-in inkhel an thunun laiin ball an inpe kual chu referee-in dang palhin Police-in an vaw let a. Sawmfela leh Armed Veng midfielder Lalbiakhlua ten passing mawi tak hmangin Chanmari tlarhnung an ṭhiat a, MS-a'n chiang zetin a tawp a rawn khar a, minute 39-naa goal lut hi first half-a goal lut awmchhun a ni.

Chhandamtu Muanawma

Mizoram Police-in keeper Muanawma zarah goal khatin hma an hruai a, second half-ah pawh hlauhthawnna nei loin bul an ṭan theh phah. Sawmfela bawk langsar nghalin a ball lakluh ṭha tak chu Chanmari keeper MS-a'n dang mah se a per aṭanga ball kal zel chu Fakzuala'n a pet goal a, minute 56-na lek a ni.

Chanmari FC-in second half bul an ṭan ṭhat tawk loh an tuar a, goal hnih khung a ṭul tak avangin hmabak a harsa tawh. Chutichung chuan Chawnga hote an beidawng lo a, siphurh sut tumin Zama, Vanlalbiaa Chhangte leh Mark Zothanpuia te an luhtir a, hun tawp lamah an goal nawr na lehzual.

Amaherawhchu, Chanmari keeper Muanawma'n goal a venghim tlat a, hun tawp hma hreta Zama leh Chhinga te goal khung tur a zawna zata a dang chu a ropui hle. Police-in 2-0 in hnehna chang mah se keeper Muanawma chu chhandamtu a ni a, a phu ang ngeiin man of the match a thlan a ni.

Semifinal hmunruak

MPL7 semifinal khel tur hriatthiam a har ṭan a, inkhelh hmabak a ngaihnawm chho zel dawn niin a lang. Hmahruaitu Chhinga Vengin knockout stage an lut tawhah a ngaih theih a, pahnihna Electric Veng dinhmun erawh a la him bik lo.

Panganaa awm Chanmari FC leh Electric Veng inkarah hian point ruk chauh a awm a, match hnih leka inpawh thlak theih a ni nachungin Ramhlun North leh Bethlehem Vengthlang ten round 8 zawhah pawh point ruk an la hmu tling lo a, inlehthal a harsa dawn tih a chiang reng.

Pathumna Aizawl FC leh palina Mizoram Police te squad a chhah ṭha a, season ṭan hmaa semifinal khel tura rin sa an ni a, tunah erawh an chiang ta bik lo. Chawnpui leh Ramhlun North hma lam hun tur a chiang thuai dawn niin a lang a, anni pahnih hian semifinal an thleng pha lo a nih pawhin semifinal khelh tumte harsatna siam turin an inpeih ang.

Chanmari hian October 25 tlaiah Chhinga Veng an hmachhawn dawn a, Chhingcows assistant coach Anand Gurung chuan, "Keini chuan kan dinhmun hi a himah kan ngai lo, chak zel kan duh," tiha a sawi avangin Chawnga hote hmabak hi a awlsam dawn lo. Mizoram Police-in draw specialist Chawnpui FC an hmachhawn dawn a, Serchhip khaw chhe hnuaia an inkhelh nen chuan a inang tawh lo ang.