MSSC secy-in MSL5 a khuh hawng

Mizoram Super League Season 5 chu Ningani zan khan Siby Farms-ah C. Laltlanthanga, MSSC secretary chuan khuh hawnna a nei a, Mizoram chhuga basketball inelna sang ber MSL5 chu October 23-a khelh ṭan tur a ni.

Tip Off zanah MSL club jersey leh MSL5 Handbook tlangzarhna neih a ni a, match commissioner KC Lalliantluanga kaihhruaina hnuaiah oath taking an nei. MSL club-te jersey hi Marvel kut chhuak a ni a, Marvel hi Anchi Apparels Pvt. Ltd. hnuaia mi a ni a, New Delhi-a hmunpui nei a ni.

MSL hmasa ber chu February 17, 2015 khan neih a ni a, chief minister Lal Thanawla chuan khuh hawnna a nei a, hemi hnu hian minister of state Lal Thanzara (MSL2), parliamentary secretary Hmingdailova Khiangte (MSL3) leh MBBA adviser Palaia (MSL4) ten an tip off leh tawh bawk.

Khatla TBL chu sulhnu nei ṭha ber an ni a, inelna hmasa pahnih an champion. TBL nomawi chawi puitu coach H. Laldinsanga chu Most Valuable Player hmasa ber a ni a, Mizo zinga national team enkawl thei hmasa ber a ni bawk.

MSL5 Tip Off zan hian Mapuia kawmna neih neiin Saron Veng tlangval chuan, "India camp-ah ka zuk awm a, a level a sang hle. Mizote tan engtikawng mahin mahni thiamnaa tel ve ngawt theih a ni lo. India camp nena min thlunzawm theitu chu Mizoram Super League hi a ni a, MSL hi India team kan tel theihna chance ṭha ber a ni," tiin Mizoram basketball inelna sang ber chu a dah sang hle.

MSL hnuhnung pahnihah erawh Khatla TBL an champion thei lo a, Mission Veng Vikings leh Zarkawt BCA te an champion. MSL5-ah hian team awm sa pali TBL, Vikings, BCA leh Tuikual South bakah BC Bethlehem leh Zarkawt Serpents te an tel thar dawn a, state pawn player bakah foreign player ṭha tak tak an lak avangin inelna a hmuhnawm khawp ang.

Champion lai BCA leh kai thar BC Bethlehem ten October 23 zanah match hmasa ber an khel dawn a. League round-ah hian vawi khat ṭheuh an inkhel kual ang a, heta sang pali hian November 22 leh December 6 chhungin semifinal an khel ang a, final hi December 11-14 inkara khelh a ni leh ang.

MSL5 Fixtures
Oct 23 BC Bethlehem Vs Zarkawt BCA
Oct 25 Khatla TBL Vs Tuikual South
Oct 26 Mission Veng Vikings Vs Zarkawt Serpents
Oct 30 Zarkawt Serpents Vs Khatla TBL
Oct 31 Zarkawt BCA Vs Mission Veng Vikings
Nov 1 Tuikual South Vs BC Bethlehem
Nov 2 Khatla TBL Vs Zarkawt BCA
Nov 6 Mission Veng Vikings Vs Tuikual South
Nov 7 BC Bethlehem Vs Zarkawt Serpents
Nov 8 Mission Veng Vikings Vs Khatla TBL
Nov 9 Zarkawt BCA Vs Zarkawt Serpents
Nov 13 Khatla TBL Vs BC Bethlehem
Nov 14 Tuikual South Vs Zarkawt BCA
Nov 15 BC Bethlehem Vs Mission Veng Vikings
Nov 16 Zarkawt Serpents Vs Tuikual South