WTA Finals khel lo tur Halep

Hmeichhe tennis world number 1 Simona Halep chu kar leha khelh tur WTA Finals-ah a inlan thei dawn lo. Romanian nula hi a hnungzâng na vangin a chawl mek a, a hliam hi a dam hman dawn loh vangin a inhnukdawk.

Thla hmasa khan Halep hi Wuhan Open-ah a inlan a, a match hmasa berah set khat chauh a khel hman tihin a inhliam. Halep hian a hliam a dam hman beiseiin inlan ngei tum mah se a dam hman ta lo.

Halep chuan, "Chawlh-kar li chhung vel ka inkhel thei tawh lo a, match level sang tak khel tur chuan ka inpeih lo a ni. Inelna lian aṭanga inhnuhdawh hi chu thil harsa tak a ni a, ka nuna a vawi khat nan ka tih a ngai ta si. Thutlukna harsa tak ni mah se ka hriselna dinhmun ngaihtuahin ka tih a ngai," a ti.

French Open champion a inlan theih dawn tak lohah chuan a tira hmun chang lo Kiki Bertens chu a inlan thei thung dawn a ni. Bertens bakah hian - Angelique Kerber, Naomi Osaka, Petra Kvitova, Caroline Wozniacki, Sloane Stephens, Karolina Pliskova leh Elina Svitolina te chu an tling tawh.

Player ṭha zual pariatte hi group pahnihah ṭhen an ni anga, an inkhelh kual hnuah a sang pahnihin semifinal an lut ang. Grand Slam ni lo mah se a ṭha zual pariatte inel nana buatsaih a nih avangin ngaihhlut a hlawh hle. October 21 aṭang hian Singapore-ah khelh ṭan a ni ang.