Football manager: Eng ang taka hna harsa nge a nih?

Football khawvelah sum a tam tawlh tawlh a, manager inchuh a na tawlh tawlh a, in ban thawm a awm reng a, pressure a sang tawlh tawlh a, "Football ka hre ve tawk," tih avanga manager nih ve tum ngawt chi a ni lo.

Season kal mekah pawh coach langsar zingah Manchester United boss Jose Mourinho, Real Madrid coach Julen Lopetegui, Bayern Munich boss Niko Kovac leh Barcelona coach Ernesto Valverde te chu dinhmun derthawnga sawi a ni leh der tawh.

Club lianin nomawi chawi an duh vek avangin manager tan 'pressure' a na a, club tenauin league sang bera inhamtan an duh vek avangin pressure a nep bik chuang lo.

A mak a na!

Kum 2018 World Cup-a Australia an inpetkai theih chhan chu Ange Postecoglou a ni a, mahse manager tam takin World Cup-a an ram team enkawl an duhthusam a nih laiin Postecoglou erawh World Cup hmain a bang daih!

Kum 53 mi manager hian, "He hna hahthlak tak hian min eiral a ni," tiin a ban chhan a sawi thlawt a, thawk lak a, chawlh hahdamna hun neih a duh - hei ringawt pawh hi manager hna hautak zia hrilhfiahtu a ni.

Manager langsar zingah Jurgen Klopp khan 2014-15 season tawpa Borussia Dortmund a chhuahsan khan club enkawl a nei lawk lo a, October 2015 khan Liverpool a zawm ve leh chauh.

Pep Guardiola pawhin 2011-12 season tawpa Barcelona a chhuahsan dawn khan chawlh hahdam a mamawh thu a sawi a, kum khat a chawlh hnuah Bayern Munich a enkawl ve leh chauh a ni!

Chhungkua thlengin...

Larna, sum leh hausakna keng tel a nih avangin mi tam takin 'Football manager' nih chu thil nuam tak ni turin an ngai a, football-a tui tak tan chuan heti zawnga ngaihdan lo neih hi a awm lo hran lo.

Mahse, Portuguese manager hriat hlawh leh tawnhriat ngah Carlos Carvalhal chuan an hna chuan chhungkua thlenga nghawng a neih avangin thil harsa tak a nih thu a sawi.

Kum 52 mi manager chuan, "Portuguese club Braga ka enkawl lai khan ka chhungte kha nuamti taka an awm theih meuh loh avangin ka hna kha ka bansan tawp mai a ni.

"Ka fate thlengin pressure an nei a, school-ah an ṭap reng a, kan chhungkua kha kan hlim lo a, pressure a na em em a, ka hna kha ka bansan mai a ṭul tih ka hria a ni. Khatihlai khan Europa League-ah kan hmabak a eng em em a, mahse ka chhungkua ka hmangaih avangin ka ban kha a ngai a ni," a ti.

Media mawlh mai hi

Sports journalism-ah chuan media-te hna ber chu inkhel report piah lamah club chhungkua va hriat bel leh thil 'thleng thei' tarlan a ni a, khawthlangah phei chuan media inelna a san avangin a hre ber nih duhin an phili ṭhin.

Real Madrid, Chelsea leh Bayern Munich te pawh lo enkawl tawh, Napoli boss Carlo Ancelotti chuan, "A chang chuan dawt hlir ka hrilh ṭhin," tiin a lo sawi tawh a, media-in a team a tihbuai a hlau.

Porto, Sporting Lisbon, Besiktas leh Swansea City lo enkawl tawh Carvalhal chuan, "Ka player te hnenah dressing room leh media hmaa ka thusawi a danglam fo tur thu ka sawi ṭhin," a ti a, media-a 'bum' ṭhin thu a pha lo!

Manager ṭhenkhat chuan media hmaah an thinrimna an thup zo lo hial ṭhin a, media pressure an zawh loh avangin an mualpho phah ṭhin - Mourinho leh Pep Guardiola te meuh pawh an bang lo.

Sir Alex kha...

Football manager-ah tu nge ropui ber ang? tih zawhna inpe ila, 'Sir Alex Ferguson' tia chhangtu chu a tam zawk an ni hial mai thei. Scottish manager sulhnu thlirin thil awm lo a ni hran lo.

United legend kha 'media pressure' zo ber pawla sawi a ni ṭhin a, journalist ṭhenkhat chu ṭhianṭha tak takah a siam hial a, hetihrual hian sawisel an ngaih hunah huaisen takin a sawisel bawk.

"Media hi mi hlauhawm takah an chang a ni. Team chhung chauha hriat chi te hi hriat an châk tlat a, thu lengvak ziah an châk a, an zawhna chhanna kan pek loh chuan kan buai nghal der chu a ni mai si," tiin a lo sawi tawh!

Indian coach zingah Khalid Jamil kha media 'pressure' zo pawla sawi a ni ṭhin. Aizawl FC coach hlui hi media hmachhawnah a ṭha a, boruak sang turah beng daih a thiam a, I League-a AFC champion-na kawngah a 'pressure' beng daih dan chu a langsar zinga mi a ni.

Social media

Tunlai khawvel ṭhang chak taka langsar ber pawl chu social media hi a nih ngei a rinawm. Mi tupawhin a duh apiang hmuh theih turin an vei zawng leh duh zawng an pholang thei a, nitin nunkawng thlenga tibuaitu a nihna hi a langsar hle.

Portuguese manager Carvalhal chuan, "Hmelma hi kan ngah tawlh tawlh a ni. Social media-ah chuan mi a tak emaw naupang kum riat mi lek pawhin an ngaihdan an pholang thei a ni," a ti a, Twitter leh Facebook-a thu 'post' tam tak chuan manager zingah pressure a siam thu a sawi.

Hei chauh a ni lo. Club neitu aṭang pawhin pressure a tam - beisei ang result a awm lohin coach-ten ban an tawk zung zung a, Mourinho leh Ancelotti te meuh pawhin 'ban' an lo tawh tawhna football khawvelah club neituten an duhzawng player an lo thlang ve fo bawk.

Carvalhal chuan, "Portugal-a third division club Leixoes ka enkawl lai khan club neitupa khan ka player khelhtir tur thlengin a rawn thlang a, mahse ka duh ang player ka khelhtir lui. Inkhelh zawhah erawh player-te hnenah 'coach thar in nei ta' tiin ka 'badge' chu club neitupe hnenah ka hlan a, ka chhuahsan nghal a ni," a ti!