Real, Atletico leh Barca inlan dawn Julen Lopetegui tan final?
Spanish chanchinbu lar Marca chuan, 'Lopetegui tan final' tiin vawiin tlai dar 4:30-a Real Madrid leh Levante inhmachhawn tur chu a thlirlawk a, Real Madrid coach Julen Lopetegui hma hun hriltu tur inkhelah a ngai.
Real Madrid, Atletico Madrid leh Barcelona ten beisei an phak loh avangin season dang zawng aiin tun season La Liga-in ngaihven a hlawh lehzual a, hmahruaitu pawh an pathum zinga mi ni loin Sevilla an ni!
Atletico hian zanin dar 10:00-ah Villarreal an lenchilh dawn a, zanin dar 12:15 veka Barca inlan tur hian ngaihven a hlawh lehzual - hmahruaitu Sevilla nen an intawng dawn a, hnehna chang zawk zawkin La Liga table chung ber an luah ang.
Lopetegui 'Final'
Real Madrid-in season bul ṭan ṭha viau mah se beisei an phak lo zui. Match hmasa pali an tlawm miah loh hnuah league match thum a zawnin an chak zo tawh lo a, hetih chhung hian goal an khung miah lo!
Zanin hi Lopetegui tan fiahna a ni dawn a, Levante lakah an chak zo lo a nih chuan Spanish media ho chuan 'ban' a nih tawh an ring - league match thum an chak loh chhung hian Champions League-ah CSKA Moscow chu 0-1 in an ngam lo bawk.
Real hian zaninah hnehna an chang zo lo a nih chuan league-a an match khelh leh hmasak ber tur hi El Clasico a ni a, Barca an lenchilh dawn - Levante lakah hian chak pawh ni se El Clasico hian Lopetegui hma hun a hril leh tho tura ngaih a ni.
Spanish manager tan thu hriat nuam tak erawh a awm tho a, tun hnaia hliam vanga talbuai Isco, Marcelo, Gareth Bale leh Karim Benzema te chu chhawr turin an hliam a dam fel tawh.
Hmahruaitu zawnna
Real chetchhiatin sawi a hlawh a, Barcelona an danglam tam bik lo. Catalan club hi an league match hnuhnung pali-ah an chak zo tawh lo!
Match hmasa pali-ah an chak a, a hnu match thumah draw result neiin vawi khat an tlawm a, vawi nga chak tawh Sevilla-in an lehpel phah - a chak zawkin La Liga hma an hruai ang.
Hetihlai hian team pahnih hi an inhnehtawk a nih chuan a chhawr thei tur ber chu Atletico Madrid an ni. Diego Simeone-a naute hian Barca nen point 15 ve ve an nei a, goal difference-ah an phak lo.
Sevilla-in point khatin hma an hruai mek a, Atletico hian Villarreal an hneh a, Barca leh Sevilla an inhnehtawk chuan team pahnih tlanpelin hma an hruai daih dawn tihna a ni.
Zanin Inkhel Tur
Real Madrid 4:30 PM Levante
Valencia 7:45 PM Leganés
Villarreal 10:00 PM Atlético Madrid
Barcelona 12:15 AM Sevilla
October 21, Pathianni
Rayo Vallecano 3:30 PM Getafe
Eibar 7:45 PM Athletic Club
Huesca 10:00 PM Espanyol
Real Betis 12:15 AM Real Valladolid
October 22, Thawhtanni Zan
Real Sociedad 12:30 AM Girona