Hamilton dahsangtu Alonso

Pathianni zan dar 11:40 hian US Grand Prix tlan a ni dawn a, Formula 1 driver championship-a hmahruaitu Lewis Ha­milton-a'n hnehna a chang a nih chuan a vawi nga nan a champion thei tawh dawn a ni.

Mercedes driver tan nomawi humhim turin hnehna chan ringawt a tawk zo lo a, a elpui Sebas­tian Vettel chu pahnihna aia hnungah a thlen a ṭul dawn bawk; tun ṭuma a champion nghal lo a nih pawhin Britain tlangval hi a dinhmun a ṭha tawh hle.

Formula 1 vawi hnih champion tawh Alonso chuan, "Lewis hi a vawi nga nan a champion ṭep tawh, a hun tawn hi a ropui danglam hle a ni. A sulhnu leh chet dan hi thlir kir ila, tunlaia driver ṭha ber a ni a, car intlansiakna sang berah hian sulhnu nei ṭha berte zinga mi a ni ngei ang," tiin a sawi.

Spanish driver Alonso hian Hamilton chu - Michael Schumacher, Juan Manuel Fangio, Ayrton Senna leh Alain Prost te huangah a tel ve phak niin a sawi bawk.