United an nung thar, Chelsea an vannei

Chelsea leh Manchester United ten Stamford Bridge-ah Inrinni zan khan inkhel hmuhnawm tak an lantir a, 2-2 in an inhnehtawk.

Blues-in minute 96-naah Ross Barkley hmangin si phurh an sut chauh a, mual pawn lama intihbuainaah Jose Mourinho pawh telin inkhelh zawh thlengin boruak a sang.

Maurizio Sarri hoten minute 21-naa Antonio Rudiger goal hmangin hma an hruai a, United-in second half-a Anthony Martial goal hnih hmangin an lehthal.

Sir Alex Ferguson awm loh hnua a vawi khat nan United-in Stamford Bridge-ah chak hmel hmuh inbeisei mah se an ṭang tluan thei ta lo.

A goal hma
Chelsea bul ṭantu zingah Eden Hazard a tel a, United lamah Juan Mata leh Victor Lindelof te chu Scott McTominay leh Eric Bailly aiah luhtir an ni ve thung. Blues tan Hazard-a'n freekick hlawh chhuakin Willian-a'n a pet over a, Belgian forward corner hlawhchhuah erawh mualneituin goal khung nan an hmang.

Minute 21-naah Willian-a corner pet chu vengtu nei lo Rudiger chuan kawh zetin a tauh lut. United goal chhuah chhanah Germany international Rudiger chhuah zalentu Paul Pogba chu dem theih a ni. United-in goal an chhuah hma avangin bus park thei dinhmunah an ding lo.

Martial a 'cial'
Tun season-a hneh loh la tawng lo Chelsea-in hma an hruai avangin United tan beisei a bo niin a lang a, inkhelh hmaa thuthang awm Juventus an hmachhawn hmain Mourinho an ban dawn tih pawh thleng dik thei dinhmunah a ding.

Amaherawhchu mikhual team hian an pu Mourinho tan an theihna zawng zawng an la chhuah thei a, tun season-a an lantir zen zen loh tlawm duh lohna chu match hnuhnung bera Newcastle an lehthal ṭum ang thoin an rawn lantir a, theihna nei sang player an kawl avangin an nawr ngam chuan an ṭha tih a lang bawk.

Season ṭan tirha Mourinho nena inhmu thiam lo Martial chu Newcastle an hmachhawn ṭum ang thoin a che ṭha nawn a, minute 55-naah French forward hian fing takin goal kil takah a khung. Goal luh hma hian Chelsea defender Marcos Alonso chu hliam vangin a tlu a, referee-in goal a pawm tho avangin mualneitu lam an lungawi lo hle.

Minute 73-naah sawisel boin Martial-a'n a khung nawn. Mata leh Rashford te hmangin United-in an vaw let a, Martial hian English forward hnen aṭanga a ball hmuh chu tiper na deuhin lang mah se a fuh tawk chiah zawk a, goal kilah tak a khung.

Goal venhim a ṭul tak zui avangin Martial lakchhuah a ni a, Mourinho-a'n lo kuahin an inkar boruak ṭha a tih a lang bawk.

Sarri hnathawh
Sarri awm hnuah Chelsea khelh dan a dang hlak a, tlarhnung aṭangin ball an inpe chhuak. Goal khata an hnufual chung pawhin 'ball mawl' an vawrh lo a, dawhthei takin ball an inpe ngam niin a lang a, amaherawhchu Italian coach hian a la duh khawp lo.

Injury minute ruk pek a ni a, minute nga thleng United ṭang thei mah se minute ruknaah David Luiz-a ball tauh chuan goal ban a per a, hemi per hi Rudiger-a'n tauh nawn mah se David de Gea-a'n a dan sak a, amaherawhchu Ross Barkley zawnah tla fuh lehin United keeper tan dan ngaihna a awm tawh lo.

Chelsea boss Maurizio Sarri chuan, "Darkar khat chhung kan khel ṭha a, a hnu lamah United ṭhatna tharum hmanga inbeihnaa kan lut. A tawp minute 30 kan khelh danah ka lawm lo a, kei chuan minute 90 chhung ball vawrh loa khelh ka duh," tiin an khelh danah lawm tluan tling lo a, an point hlawhchhuahah erawh a lawm thung.

United an ṭha zawk?
Chelsea-in 62% ball an chang a, United goal attempt vawi sarih let thum zet goal attempt nei bawk mah se Mourinho chuan an ṭhat zawk thu a sawi.

Portuguese manager Mourinho chuan, "Inkhelh hmain point khat a ṭhat tawk thu in sawi a, chuvangin Stamford Bridge-a kan point hmuh zat hi a ṭhain a ngaih theih. Amaherawhchu, inkhelh banah chuan keini tan point khat hmuh hi a na a ni. Team ṭha zawk kan ni a, kan talbuai lo a, goal thum khung theihna ṭha tak kan nei bawk," tiin team ṭha zawk an nih thu a sawi a, an khelh ṭhat avangin ban thuthang pawh a reh chho zel.

Injury time chungchang sawiin United manager chuan, "Referee dang pawhin Mike Dean ang thoin minute ruk an pek belh ṭhin se ka ti hle. Mahse kei chu ka team enkawl an chak loh chuan minute nga, ruk leh sarih hi min pek belh ve ngai lo," tiin awmze nei takin referee a khak.

A tawpah buaina
Chelsea-in an siphurh an sut chiah tihin technical assistant Marco Ianni chuan United technical area lamah an goal khung a lawm chiam a, a let leh lamah Jose Mourinho zawnah chiah a kut tum chu boruak a hnek a, Portuguese manager chuan en liam mai loin a um zui nghal. Inkhelh banah Chelsea ṭantuten an club tihmingṭha tawhtu an theihnghilh a, Mourinho hian a kutzungṭang hmangin league nomawi vawi thum a chawi pui tawh thu a hriat nawn tir thung.

Blues boss Maurizio Sarri chuan, "Thil thleng kha ka hmu lo a, Jose Mourinho nen kan inbe tawh. Thil thlengah khan a tisualtu zawk kan ni tih ka hria a, ka thawhpuite pawh ka bia a, kan chingfel tawh," tiin a thiam lo zawk thu a sawi.

United manager Jose Mourinho chuan, "Sarri assistant chet dan zawk kha a mawi lo em em a, mahse Sarri kaihhruaina hnuaiah a fel tawh. Ngaihdam min dil ve ve a, kei pawhin ka pawm a, sawi zui tur a awm tawh lo. Mi chet dan zawng zawng hi ziah vek tum lo ula, keipawhin a hming pawh ka hre lo a, hriat kher pawh a ṭul lo. Tunah chuan engkim a fel tawh e," tiin a ngaihdam thu a sawi.