Vawiin aṭangin MPL Under 18

Mizoram Premier League Under 18 chu vawiin aṭangin RG Stadium-ah an khelh ṭan dawn. Kum bithliah inelna kaltlang hian player ṭha tak tak chherchhuah a ni tawh a, tun ṭum inelna pawh hi a hmuhnawmna piah lamah naupang chher hriamna a nihna hi a hlutna tur a ni leh ang.

Vawiin hian team MPL club pariat te Under 18 Team an inlan vek dawn a, match hmasa berah Bethlehem Vengthlang FC leh Chanmari FC te an inhmachhawn dawn. Chawnpui leh Ramhlun North, Mizoram Police leh Electric Veng bakah Aizawl FC leh Chhinga Veng te an inkhel chhunzawm ang.

MPL Under 18 hi inelna ṭantirh lamah chuan kum 17 hnuai lam inelna a ni a, ISL club Jamshedpur FC tana khel mek Jerry Mawihmingthanga bul ṭannaah a ngaih theih. Chanmari tlangval Jerry hian inelna ṭantirh hian an veng club-ah khelin inelna hmasa pahnihah an champion ve ve bakah best player leh top scorer a ni kawp ve ve bawk.

Chanmari FC hun a ral a, Mizoram Police FC an rawn lang a, anni hi 1st Bn MAP Academy nen sawi zawm theih an ni. Coach Lalramhluna leh a thawhpui ten Police academy kaltlangin player ṭhahnem tak an chher chhuak tawh a, chung zingah chuan R. Laldanmawia pawh a tel.

MPL5 U18-ah Bethlehem Vengthlang FC an champion a, hemi ṭum hian Santosh Trophy-a Mizoram aiawha tel tawh BVT defender K. Lalmalsawma chu best player a ni a, ani hi tunah hian ISL club ATK aṭangin Chhinga Veng-ah loan in a khel mek.

Season liam ta khan Chhinga Veng an champion ve thung a, hemi ṭuma goal khung tam ber leh best forward F. Lalnuntluanga, best player C. Beithalo bakah Chanmari FC innghahna Lalnunzama te chu nikuma Mizoramin Khelo India an champion theihna chhan a ni.

MPL-a champion hmasa ber Dinthar FC-in MPL kum bithliah inelnaah nomawi chawi lo mah se vawi ruk inelnaah vawi nga zet final an lut a. Maimawms-ah hian ISL club Bengaluru FC tana khel mek Sairuatkima pawh a khel tawh ṭhin a ni.

Inelna Champion
MPL1 U17 Chanmari FC
MPL2 U17 Chanmari FC
MPL3 U18 Mizoram Police FC
MPL4 U18 Mizoram Police FC
MPL5 U18 Bethlehem Vengthlang FC
MPL6 U18 Chhinga Veng
Round 1 - RG Stadium
22 October, Thawhṭanni
Bethlehem VT FC 08:00 AM Chanmari FC
Chawnpui FC 11:00 AM Ramhlun North
Mizoram Police 12:00 PM Electric Veng
Aizawl FC 02:00 PM Chhinga Veng
Round 2 - RG Stadium
25 October, Ningani
Chawnpui FC 08:00 AM Bethlehem VT FC
Mizoram Police 11:00 AM Chanmari FC
Aizawl FC 12:00 PM Ramhlun North
Chhinga Veng 02:00 PM Electric Veng
Round 3 - Lammual
30 October, Thawhlehni
Mizoram Police 10:00 AM Bethlehem VT FC
Aizawl FC 12:00 PM Chawnpui FC
31 October, Nilaini
Chhinga Veng 10:00 AM Chanmari FC
Electric Veng 12:00 PM Ramhlun North