Bike khalh thiam ber Marc Marquez

Marc Marquez chu a vawi nga nan MotoGP champion a ni leh ta. Nimina Japanese MotoGP tlan zawh takah Spanish rider hian hnehna a chang a, tun season intlansiak hmabak pathum la awm chungin a elpuite tan umphak theih a ni tawh lo!

Twin Ring Motegi tlankawnga intlansiakah Marquez-a'n parukna aṭangin bul ṭan mah se tunlaia rider ṭha ber a nihzia chiang takin a lantir. Honda bike khalhtu hian a hma a awm zawng zawng tlan pel vekin, a elpui ber Andrea Dovizioso chu 18-naah a thlen avangin point a hmuh belh lo a, hei vang hian Marquez tan kawng a inhawng zau zual a ni.

A ṭha ber chu...

Tun season chhungin MotoGP intlansiak vawi 18 neih tur zinga 15 an tlan tawh a, heng zinga vawi riatah Marquez hian hnehna a chang thei. Japanese MotoGP-a hnehna chang tur erawhin vanneihna a mamawh tel.

Qualifying lama a chetṭhat tawk loh avangin Spanish rider hian parukna aṭangin intlansiak bul a ṭan, tun hma lam chuan a hma lam pangana chin aṭanga bul ṭan lo chung chuan hnehna a la chang ngai lo.

Mahse, a hmaa awm British rider Cal Crutchlow chu hma taka tlan pelin, chak taka hma sawn zelin pole aṭanga bul ṭantu Dovizioso pawh a pel hman. Amaherawhchu, lap 24 tlan tur zinga lap 21-na an tlan laiin Marquez tihsual vangin Dovizioso bawk a hma zawkah a tlan leh.

Lap hnuhnung ber thlengin an inel tawk hle a, a hmaa tlan Dovizioso chu kawng sirah tlan lut zeuhin a dinhmun a tlak hniam phah a, amah hnaihtu Marquez-a'n hnehna chan phahin a hnungah Crutchlow, Alex Rins leh Valentino Rossi te an thleng ve bawk.

Thawhrim rah

Kum 25 mi chauh la ni mah se Marquez-a'n bike intlansiakna sang berah nomawi vawi nga a chawi tawh a, a tluk loh chu Valentino Rossi (7 titles) leh Giacomo Agostini (8) te chiah an ni ta, a kum ngaihtuah chuan hmabak a nei eng takzet.

Hnehna a chan hnuah Marquez chuan, "Kar tluanin ka thawkrim em em a, a tawpah chuan hlawhtlinna ka hlawh chhuak ta hram a ni. Ka elpuite hneh turin ka bei nasa hle, a bik takin tun ṭumah khan tlan pelh tur ka ngahin hna a hautak em em a ni.

"Dovizioso hian season a hmang ṭha a, tun ṭumah pawh khan podium lawn phu khawpin a tlan ṭha, a tawpa a chesual zauh erawh ka tawrhpui hle a ni," tiin a sawi. Season tawp hmain Malaysian Grand Prix leh Spanish Grand Prix te an la tlan leh ang.

Japanese MotoGP Results
# Rider Ram Team Time
1 Marc Marquez Spa Honda 42mins 36.438secs
2 Cal Crutchlow GB LCR Honda +1.573
3 Alex Rins Spa Suzuki +1.720
4 Valentino Rossi Ita Yamaha +6.413
5 Alvaro Bautista Spa Ducati +6.919
6 Johann Zarco Fra Yamaha +8.024
7 Maverick Vinales Spa Yamaha +13.330
8 Dani Pedrosa Spa Honda +15.582
9 Danilo Petrucci Ita Ducati +20.584
10 Hafizh Syahrin Mal Yamaha +24.985
Championship Standings
# Rider Ram Team Points
1 Marc Marquez Spa Honda 296
2 Andrea Dovizioso Ita Ducati 194
3 Valentino Rossi Ita Yamaha 185
4 Maverick Vinales Spa Yamaha 155
5 Cal Crutchlow GB LCR Honda 148
6 Johann Zarco Fra Yamaha Tech3 133
7 Danilo Petrucci Ita Ducati Pramac 133
8 Jorge Lorenzo Spa Ducati 130
9 Alex Rins Spa Suzuki 118
10 Andrea Iannone Ita Suzuki 113