Champion in um: City leh Liverpool chak zel

League match hmasa pakuaa tlawm loh chu tam tak a ni tawh a, league dang tam takah chuan hmahruai fal puina tham a ni tawh. Tuna kan ziah erawh Premier League chanchin a ni a, sang fal an la awm hleithei lo.

Manchester City, Liverpool leh Chelsea ten league match kua an khelh tawhah tlawm hmel an la hmu lo vek; City-in 5-0 in Burnley an sawp a, Liverpool-in 1-0 in Huddersfield Town an hneh a, Chelsea-in Manchester United an inhnehtawkpui a, season ṭantir aṭangin champion inum boruak a sang nghal.

City-in an mikhual Burnley laka hnehna chang turin harsatna an tawk lo a, Sergio Aguero, Bernardo Silva, Fernandinho, Riyad Mahrez leh Leroy Sane ten goal khat ṭheuh an khung a, Burnley-in a chhanletna an nei lo.

Liverpool tan Mohamed Salah chu danglamna thlentu a ni a, Egyptian forward finishing 'tawih' zet hmangin Reds hian an mikhualna ramah Huddersfield chu 1-0 in an hneh.

Goal khung thiam City

Manchester City-in attacking football hmuhnawm an pho chhuak zel a, an elpui ber Liverpool leh Chelsea tan erawh hmuhnawm a tling lo tawp ang!

City hian minute 17-naah Sergio Aguero hmangin goal hmahruai an khung a, an goal hnihna lut tur erawhin an nghah rei a ngai - minute 54-naah Bernardo chuan an goal hnihna hi a khung ve chauh.

Bernardo goal khung danah erawh Burnley-in sawisel tur an nei - penalty area-ah Leroy Sane a tlu a, City-in penalty an hlawh emaw an in ti a, Burnley player-te pawh an chawl det.

Referee-in penalty a ham lo a, Burnley player inrin loh karah David Silva chuan ball changin Bernardo tan a siamsak a, Portuguese midfielder hian harsatna nei loin goal-ah a chantir.

A surin goal a sur!

City-in an goal hnihna an khung hnuah an hawi let tawh lo. Goal hnihna a luh aṭanga minute hnih hnu lawkah Fernandinho chuan an goal thumna a khung a, Mahrez khung tur siamsak zuiin Sane chuan a hmawr a bawk ve leh bawk.

City boss Pep Guardiola chuan, "Kan goal hnihna leh thumna inhnaih taka kan khung hnu khan kan tan chuan game kha a awlsam tawh a ni. Goal mawi tak tak kan khung a, chance duhawm tak tak kan nei a, a pawimawh ber chu point thum kan hmuh belh bawk," tiin a hlim hle.

Burnley goalkeeper nichungin Joe Hart chu City khelmualah a kir a, fan-ten an goalkeeper chhuanvawr ni ṭhin hi an lo lawm hle - first half-ah Aguero leh Silva khung tur nia ngaih chu ṭha takin a dang a, second half-ah erawh a ding tlang zo lo.

Hart chuan, "Fan-ten min lo lawm dan avangin ka lawm a, mahse Burnley player ka nihna anga he hmun rawn kal ka nih avangin result-ah erawh ka lawm lo a ni," a ti.

Salah a lo kir e

Mohamed Salah-a'n league match hnuhnung pali-ah goal a khung tawh lo a, amah sawiseltute thawm a ring hle. Inrinni zanah erawh Salah seltute aiin Egyptian forward thawm a ring zawk a, minute 24-naah Reds tan goal class sang a khung.

Season hmasaa Liverpool tana goal 44 khungtu forward hian tun season-ah league-a goal li a khungna chauh a ni a, hetih chhung hian Premier League match kua a khel hman - English club tana a goal 50-na chiah a ni nghal.

Reds tan goal 48 khungin Chelsea tan goal hnih a khung a, heti zat goal khung tur hian match 83 chiah a mamawh. Huddersfield laka goal-a khungna kawngah Xherdan Shaqiri chu fak phu a ni a, Swiss winger hian mawi zetin a siamsak.

Salah hian goal dang khung turin chance duhawm tak a nei bawk a, mahse a hun ṭha neih vawi hnihna erawh uiawm takin goal-ah a chantir thei lo.

Klopp a hlim

Huddersfield khelmualah Liverpool-in hnehna chang mah se an ṭhat dan berin an khel chhuak lo. Mualneitu team hian vawi tam Reds tlarhnung an rum ṭhaih. Premier League-a a vawi khat nan Fabinho chu bench aṭangin luhtir ni mah se Reds midfield talbuai a siamṭha thei bik lo.

Captain Jonathan Hogg chuan post a pet per a, James Milner handball vanga penalty an beisei chu Huddersfield hi pek an ni lo bawk. Huddersfield boss David Wagner chuan, "Kha handball kha penalty a nih loh chhan ka hrethiam lo," a ti.

Jurgen Klopp-a ṭhianpa Wagner a lawm lo a, Liverpool boss erawh a lawm hle thung. German coach chuan, "Point 23 kan nei tawh a, match kua hnua heti zat point kan neih hi ka lo beisei lo.

"Hmasawnna tur tam tak kan la nei a, insiamṭhat kan ngaihna laite siamṭha turin theihtawp kan chhuah chhunzawm ang, " a ti a, an khingpui team fak zuiin, "Zanin kan inkhelh zawhah kha chuan team ṭha tak an nihzia miin an hre tawh ang," tiin a ṭhianpa enkawl team a fak.