Real an tlawm leh ta; Lopetegui dinhmun a him lo?

Inelna hrang hrangah match nga chhung chu Real Madrid an chak zo ta lo. Inrinni zan khan Real Madrid hian insiamṭhat tumin Levante an mikhual a, mahse La Liga team 'naran' ve tak lakah 1-2 in an tlawm.

Khawvela team ṭha ber ber te pawh an talbuaina Santiago Bernabeu chu Levante tan tual­chaina 'nuam' a ni a, Real coach Julen Lopetegui dinhmun him lo a sa a him belh lo leh ta bawk.

Real-in Thawhlehni zanah Champions League match khel turin Viktoria Plzen an mikhual zui dawn a, league-a an hmabak neih leh hmasak ber lah El Clasico a ni - a awlsam dawn lo.

League match li ngawt an chak zawh tawh loh hnuah Bar­ce­lona erawh an insiamṭha, an mikhual Sevilla chu 4-2 a hnehin La Liga hmahruaitu an ni. Inkhelh zawha sawi hlawh ber erawh Lionel Messi inhliam chu a ni.

In nem lua a ni!

Santiago Bernabeu-a goal khung turin Levante 'meuh' pawhin hun an duh rei lo. Minute rukna lekah Jose Luis Morales chuan goal hmahruai a khung a, minute sarih a liam a, Levante bawkin an khung nawn!

Real defender Raphael Varane chuan penalty area-ah a kutin ball a khawih fuh a, referee-in freekick pe zet mah se VAR hmanga ennawn a nih hnuah penalty area chhungah a kutin a khawih ngei tih a lang a, Roger Marti chuan harsatna nei loin a khung.

European champion-in chak ngei tumin vawi tam an nawrlet a, woodwork leh Levante keeper Oier Olazabal save ṭha tak takte chu Real goal khung tur ti khawtlaitu an ni - shot vawi 34 ngawt an nei!

Minute 72-naah Marcelo chuan an si phurh a sut ṭhen ta nge nge a, goal dang erawh an nei ta lo. Marcelo-a'n goal khung mah se kum 1985-a minute 464 chhung goal khung loa hun an lo hman tawh chu an khum ta tho a, goal a luh hma khan minute 482 goal khung loin an awm hman - an club chanchina goal an khung loh zawn rei ber ṭum a ni.

Lopetegui a phang lo

Real-in Levante an hma­chhawn hmain tun hi atan enchhinna hnuhnung ber tawh tur ang hiala sawi a ni a, an chak lo ta ngei bawk. Mahse, Real boss erawh a zam phah lo a, ban a hlau lo!

Spain coach hlui chuan, "Ban lam reng reng ka ngaihtuah lo. Ka nauten an theihna zawng zawng an pe a ni tih ka hmuh avangin ka phur em em zawk a, kan buaina lak aṭang hian kan tal chhuak em em ang.

"Player-te pawh kan result vangin an hnual ngei a ni tih thuah phat tur a awm lo a, mahse eng takin kan hmabaka awm match an thlir zawk a ni. An theihna zawng zawng an hlan a, kan tho leh dawn a ni," tiin a inringtawk hle.

Real Madrid director Emilio Butragueno chuan inkhelh hmain Lopetegui a rin tlat thu a sawi tawh a, mahse Levante laka an result-in a ngaihdan a sawhsawn tir tawh mai thei - Champions League leh El Clasico-in thui tak a hril bawk ang.

Messi a pawi mang e!

Barcelona-in hmahruaitu Sevilla chu 4-2 a hnehin table chung ber luah mah se an thiampuipa Lionel Messi chu hliam vanga lakchhuah a nih avangin an lawm a kim lo a, Argentine forward hian Champions League-a Inter Milan an mikhual hunah leh El Clasico an khelh hunah a hmel a lan thei lo ang.

Messi hi Franco Vazquez nen ball an inchuhna lamah a tlu sual a, a ban dinglam chu na takin a sawh - he thil thlen hunlai hi minute 26-na chauh a ni a, mahse Barcelona captain hian assist leh goal a nei hman tho!

Minute hnihna lekah Philippe Coutinho goal khung tur a siamsak a, minute 10 hnuah mawi zetin an goal hnihna a khung ve leh bawk. Kum 31 mi forward hian tun season-ah Barca tan match 12-ah goal 12 a khung tling leh der tawh.

Messi lakchhuah a nih hnuah khel ṭha em em mai Luis Suarez chuan penalty hmangin an goal thumna a khung a, Ivan Rakitic chuan volley ṭha zet hmangin a thawh ve leh bawk - Clement Lenglet chuan Pablo Sarabia shot chu an lamah a ti lut a, Luis Muriel chuan hun pek belhah a khung ve leh bawk a, Sevilla tana point hlawhchhuah nan erawh a tawk zo lo.

Beisei phak lo Atletico

Real chetchhiat laiin Madrid khaw club ve tho Atletico Madrid-in eng ruai an ang thei bik lo a, an mikhualna ramah Villarreal nen goal khat ve ve khungin an inhnehtawk.

Atletico Madrid hian minute 51-naah Filipe Luis hmangin goal hmahruai an khung a, mahse mualneitu team-in Mario Gaspar hmangin an chhanglet. Hun tawp thlenga goal dang a luh loh avangin point an insem.

Luis goal khung chu Antoine Griezmann freekick pet aṭanga lut ni mah se inkhel pumpui thlirin French forward-in beisei a phak lo a, international break hlana Germany laka goal hnih khungtu hian 'open play' aṭangin shot vawi khat chiah a nei.

Atletico tan goalkeeper Jan Oblak chu fak phu ber zawk a ni a, save ṭha tak tak a nei nual. Hetihrual hian Atletico hian chak theihna hun ṭha erawh an nei tho a, mahse Thomas Lemar chuan minute tlemte chauh a awm tawh tiha a hun ṭha neih chu a khawhral a ni.