Lianzuala hoin Delhi-in point hlawh chhuak

Delhi Dynamos chuan Kerala Blasters laka si an phurh reng hnuin hun tawp nan minute ruk chauh a awm tawh tihah an si phurh an sut a, Kerala Blasters nen 1-1 a inhnehtawkin point an insem.

Kerala khelmuala inkhelah Lallianzuala Chhangte chu Emer­ging Player of the Match-ah thlan a ni a, Lunglei rawlthar hian minute 90 chhung khel tluanin a khel ṭha hle.

Lalruatthara telna Kerala Blas­ters tan hian CK Vineeth chuan second half minute thumnaah goal hmahruai a khung a, an chakpui tawh mai dawn emaw tih laiin Andrija Kaludjerovic chuan Delhi tan minute 84-naah an si phurh hi a sut a ni.

Daniel Lalhlimpuia chu hun rei tak chhung hliam vanga a chawlh hnuin ngai a awh leh ṭan tawh a, Ser­chhip striker hian Delhi tan Blasters lakah bench a rawn luah leh thei tawh a ni - khelmualah erawh luhtir a la ni rih lo thung.

Hetihlai hian Maharashtra derby boruak sangah Lalchhuanmawia Fanai chu hnawhchhuah a ni a, Lengpui tlangval hian Modou Sougou goal khung tur nia lang chu dan tumin a 'tackle' a, Senegal tana vawi 12 inlan tawh winger hian keeper chauh a hmachhawn tawh bawk si avangin Chhuantea hi red card pek a ni a, penalty a chawi bawk.

Chhuantea penalty chawi hi Rafael Bastos chuan harsatna nei loin goal-ah a chantir a, penalty an hlawhchhuah hma hian Sougou hian minute 25-naah goal hmahruai a khung bawk - Mumbai hian injury time-ah penalty dang an hlawh chhuak leh a, hei erawh Lucian Goian chuan goal-ah a chantir thei lo.

Zanin dar 7:30-ah Pune City hian Bengaluru an mikhual zui dawn a, Chhuantea hian red card a hmuh avangin a club hlui hi a hmachhawn thei lo ang.